Goal sarih khungtu Liverpool chak chiang

Ningani zan League Cup inkhelah Liverpool-in hnehna chang turin harsatna an nei lo a, Reds ‚second team‘ tia chhal theih inlan chuan League One club Lincoln City chu 7-2 ngawtin inkhelh an zirtir. 

Liverpool tan Takumi Minamino leh Curtis Jones-ten goal hnih ve ve an khung a, Xherdan Shaqiri, Marko Grujic leh Divock Origi-te chuan goal khat ṭheuh an khung ve bawk. Reds hian fourth round-ah Arsenal an hmachhawn ang. 

Manchester City boss Pep Guardiola-a‘n inkhel bul ṭantu zingah kum 20 pawh tling lo player panga ngawt a dah a, hetichung hian fourh round a Burnley hmachhawn turin Bournemouth chu Liam Delap leh Phil Foden goal khung hmangin 2-1 in an hneh. 

Aston Villa chuan harsatna nei loin Bristol City chu 3-0 in an sawp bawk a, Villa tan player thar Bertrand Traore chuan a club thar tana a match hmasa berah goal a khung nghal a, Anwar El Ghazi leh striker manto Ollie Watkins ten goal khat ve ve an khung bawk - fourth round-ah Stoke City an hmachhawn ang. 

Hliam vanga rei tak a talbuai hnuah Xherdan Shaqiri a inlar ve leh ta a, Swiss midfielder hian minute kuana lekah freekick hmanga mawi zeta goal khungin a dam tawh tih a pholang. 

Liverpool tana Japanese forward Minamino-a goal hnih khung inkarah rawlthar duhawm Curtis Jones chuan goal hnih a rawn khung bawk a, Grujic leh Origi ten goal khat an thawh bawk. 

Lincoln tan Tayo Edun leh Lewis Montsma ten goal khat ve ve thawh ve mah se awmzia a nei lo a, a tawpah goal sarih khungtu Liverpool-in 7-2 in hnehna an chang - Reds hian tun season match thum an

khelh aṭangin goal 13 ngawt an khung ta!

Liverpool tan pound maktaduai 41 man, forward thar Diogo Jota chu second half-ah bench aṭanga luhtir a ni a, nipui transfer a lakluh Kostas Tsimikas leh academy rawlthar Rhys Williams-te chuan Reds tana an match hmasa ber an khel bawk. 

Kum 19 mi Curtis Jones-a‘n goal hnih a khung a, English midfielder hian season hmasa khan Liverpool tan inelna hrang hrangah match 12 khelin goal thum a lo khung tawh bawk. 

Jurgen Klopp chuan a player ṭhangduang hi fakin, „Kan hma hun lo awm turah kan la hlimpui hle ang tih hi ka chiang a ni,“ tiin Jones a fak a, Liverpool fan-te lawmna thlen fo turah a ngai. 

Klopp chuan inkhel thlirkir zuiin, „Game ṭha tak zaninah khan kan khel a, en mai kha chuan a awlsam hmel em em a ni. Ball kan inpe tam a, a tawpah ṭha takin a hnu kan khar zel. Ka naute khan football tak tak khelh an duh a, an rilru paukhauh tak min hmuhtir a ni,“ a ti. 

Liverpool tan Virgil van Dijk chuan inkhel bul a ṭan a, second half-ah Fabinho chuan a thlak bawk - minute 75-naah Naby Keita luhtir a ni a, player pathum tih loh hi chu Reds team-ah ‚regular‘ player tia chhal tur an awm lo. 

Manchester City boss Pep Guardiola-a‘n Bournemouth an hmachhawn hmain academy player rual a chhawr tur thu a sawi tawh a, City starting XI zingah Kyle Walker, Riyad Mahrez leh Rodri chu senior player an ni. 

City tan kum 17 mi Delap kan hmu hmasa ber a, English striker hian minute 18-na lekah Phil Foden-a ball pek duhthusam chu ṭha zetin goal-ah a chantir - City tana a match hmasa berah goal a khung nghal. Cherries hian minute li hnu lawkah Sam Surridge hmangin chhanglet mah se Manchester khaw club tan Foden chuan minute 75-naah chakna goal a khung a, Bournemouth-in a chhanletna tur an nei tawh lo. 

Foden hian season hmasa aṭang khan match khata goal leh assist neih kawpna match hi pali zet a nei a, season hmasa ṭantir aṭanga chhiarin ani aia match khata goal khung leh assist-na game nei tam zawk chu Kevin De Buryne (8) leh Mohamed Salah (6) chiah an ni. 

City tan rawlthar kum 17 mi lekin a match hmasa berah goal a khung nghal a, City-in player inhliam an ngah avanga senior team training zawmtu striker hian ngaihventu a ngah nghal hle. 

England tana Under 15, 16 &17-a lo khel tawh striker hian nikum khan Derby County aṭangin Manchester City academy a zawm a, tharum a ngah bakah a tlan chak tel bawk. 

Premier League en ṭhin chuan Derby County, Southampton, Sunderland leh Stoke City tana khel ṭhin midfielder Rory Delap kha kan hre furin a rinawm a, Delap hi Rory-a fapa a ni! Delap chuan, „Naupang ka nih aṭanga ka beisei ber chu professional football khelh a ni a, match hmasa bera goal khung aia hlu zawk a awm thei lo,“ tiin a sawi a, kum 17 mi striker hian goal a khung piahlamah Bournemouth tlarhnung a chhaih mangang ngun hle. 

Aston Villa-in Championship club Bristol City lakah zahngaihna an lantir duh lo a, Carabao Cup fourth round khelh ngei an duh tih pholangin Bristol hi 3-0 in an hneh. 

Villa tan El Ghazi chuan goal hmahruai a khung a, pound maktaduai 17-a Lyon aṭanga Villa pantu Bertrand Traore chuan Villa-in sum an inseng sual lo tih pholan nan mawi zetin an goal hnihna a khung bawk. 

Villa  assistant boss John Terry chuan Chelsea tana a lo khelhpui tawh Traore fakin, „Chelsea-ah khan tuihalna tak a nei a, a hnuah Premier League a chhuahsan zui. Mahse, he hmuna lo kir a, a theihna pholan leh hi a chak reng ṭhin a ni,“ a ti. Pound maktaduai 28 man Ollie Watkins-a‘n Villa player manto ber ni tura Villa Park a pan chhan a pholang ve zui bawk a, Watkins hian second half-ah an goal thumna khungin a hmawr a bawk.