Ranji Trophy Biakvela'n wicket riat a la

Ranji Trophy-ah G. Lalbiakvela chuan Sikkim lakah wicket pariat ngawt a la a, Mizoram chu chak thei dinhmunah a dintir. Mizoram hian bat hmasain first innings-ah run 201 an siam a, Luangmual tlangval G. Lalbiakvela chet ṭhat zarah Sikkim-in run 139 chauhin an chhanglet.

Nimin khan Mizoramin a vawi hnih nan (2nd innings) bat lehin run 139 an siam a, Sikkim tan 242 target an siamsak. Ranji Trophy match khat hi ni li chhung khelh tur a ni a, Sikkim hian chak turin ni hnih chhung hun an neih avangin Mizoram bowler-te an pawimawh ang.

Bhubaneswar-ah Pathianni khan 1st innings ṭan a ni a, Mizoram tan Taruwar Kohli-a'n century (113) siamin opener Lalhruaizela'n run 30 belh bawkin run 201 an tlin. Sikkim bat hun thleng a, Mizo bowler G. Lalbiakvela'n hming chher nan hmangin wicket riat lain run 56 a pe. 

Second innings-ah pawh G. Lalbiakvela hi batting-ah a che ṭha chhuznawm a, run 41 vaw chhuakin Mizoram tana amah aia run siam tam chu Kohli (55)  leh KB Pawan (51) te chiah an awm. Mizoram hian Ranji Trophy-ah hnehna an la chan ngai loh avangin ni hnih khelh hmabak hi a pawimawh hle.