Champions League Bayern an tho thei dawn em?

Zanin dar 12:15-ah Champions League quarter final second-leg inkhel pahnih en tur a awm dawn a, Bayern Munich-in Allianz Arena-ah FC Porto an mikhual anga, Nou Camp-ah French club Paris Saint Germain an zinchhuak bawk ang.

Goal hnih phur sa Bayern

Kar hmasa Champions League quarter final first leg-ah beisei loh result kan hmu a, Porto khelmual Estadio do Dragão-ah rin loh takin Bayern Munich 1-3 in an tlawm.

Bayern Munich hian Porto laka an tlawm hi an la na khawp a, Pep Guardiola -a'n an chak loh chhanah an players hliam te enkawl dam har tiin medical team te a dem a, kum 38 chhung Bayern Munich doctor hna lo thawk tawh Hans-Wilhelm Muller-Wohlfahrt chuan a hna a bansan phah hial.

Bayern hi tunhnaiah inhliam vangin an buai nasa hle a, Porto nena an inkhel hmasa zawkah khan an player pawimawh Arjen Robben, Mehdi Benatia, David Alaba, Javi Martinez leh Tom Starke te chu inhliam vangin an lo chhawr thei lo tawh a, second-leg ah pawh an chhawr theih a la beiseiawm chuang loh. Franck Ribery chu hliam vang tho in a khelh theih a la rinawm loh a, Philipp Lahm leh Bastian Schweinsteiger te an in fit hman dawn leh dawn loh a la chiang lo bawk.

Bayern in goal hnih phur sa in Porto an hmachhawn dawn a, goal chhuah miahlo a goal hnih an khung theih chuan away goal rule hmangin an tlang thei ang.

Bayern hi Porto an hneh loh hnua an match hmasa berah insiam ṭha nghalin Hoffenheim chu 2-0 in khualmualah an hneh lehnghal thei a, zaninah Porto lakah an insiamṭha thei ang em? tih hi hmuh chakawm chu a ni.

Barca tan semi-final a chiang em?

Zanin Champions League quarter-final inkhel tur dangah Barcelona in an khelmual Nou Camp-ah French club Paris Saint Germain an lo mikhual dawn a, first leg-ah 3-1 a an chak tawh avangin tlang chiang sa ang deuh thaw a ngaih theih an ni.

PSG tan an player pawimawh Thiago Silva khelh theih dawn leh dawn loh a la chiang lo a, a tel lo a PSG tlar hnung in Barca tlar hma an ngam loh zia kan hmu tawh. A lo kir thei anih chuan PSG tlarhnung a phui phah khawp ang. Thiago Motta chu PSG player zinga khel thei lo tur chiang sa a ni a, Barca player Andres Iniesta dinhmun a chiang lo bawk.

French club tan goal chhuah miah loh mai bakah goal thum lai khung a ngaih dawn avangin Champions League semi-final luh beiseina a chau tawh hle.

Zanin Inkhel Tur

UCL Quarterfinal 2nd Leg

12:15 AM Barcelona Vs PSG

(1st Leg-ah Barcelona 3-1 in an chak)

12:15 AM Porto Vs Bayern Munich

(2nd Leg-ah Porto 3-1 in an chak)