Formula One Bahrain Grand Prix-ah Hamilton a ropui
Kuminah Formula one intlansiak vawi li a awm tawh a, kartawp khan Bahrain Grand Prix tlan zawh a ni leh ta. Mercedes driver Lewis Hamilton chu pakhatna a ni leh a, kuminah intlansiak pali aṭangin vawithum pakhatna a ni tawh.
Bahrain International Circuit-ah hian lap 57 an tlan a, qualifying lama che ṭha Mercedes bawk atakah pawh an chungnung leh a ni. Pole position aṭanga bul ṭan Hamilton chu tuma el phak lohin a tlan ṭha a, pakhatna a ni chiang hle. Hamilton hian kumina intlansaik a hmachhawn tawh zawng zawngah pole position aṭangin bul ala ṭan vek a ni.
Bahrain Grand Prix-ah hian Ferrari driver Sebastian Vettel-a'n beisei a pha lo a, pahnihna aṭangin intlansiak hmachhawn mah se a tawpah chuan pangana a ni pha chauh a ni. Hamilton a team-mate Rosberg pawh a tlan ṭha hle a, mahse lap hnih chauh tlan tur a awm tawh tihah Ferrari driver Kimi Raikkonen chuan a leh pel a, intlansiak tawp thlengin a umpha tawh lo.
Pathumna dinhmun luah phalo Williams driver Valtteri Bottas leh Sebastian Vettel te palina nih tuma an inum boruak a sang hle a, Bottas hian fimkhur leh fing tak chungin Vettel hi a dang tluan thei a ni.
McLaren driver Fernando Alonso-a'n kumina a vawikhat na atan point a hmu teuh hle mai a, mahse Williams driver Felipe Massa a lehpelh theih loh avangin 11-naah a tlang pha chiah chiah a, point a hmu pha lo chiah a ni.
World champion nilai Hamilton chuan, "Mercedes hi kan ṭha ber tih kan pholang leh ta, amaherawhchu keini ang bawka ṭha hi an awm a, chu chu Ferrari an ni. Inthlahdah thei kan ni ni lo, kan chesual zeuh a nih chuan min rawn tlan pel nghal mai thei dawn a ni. Vawiin khan kan team kha tlan ṭha em em a, mahse a la tawk mai lo. A chhan chu, Rosberg nen kan inkarah Raikkonen a awm thei tlat a ni, pakhatna leh pahnihna nih zel hi kan duh," tiin a sawi.
2015 Bahrain Grand Prix result
Pos Driver Team Points
1. Lewis Hamilton Mercedes 25
2. Kimi Raikkonen Ferrari 18
3. Nico Rosberg Mercedes 15
4. Valtteri Bottas Williams 12
5. Sebastian Vettel Ferrari 10
Formula one 2015 World Championship drivers' satndings
Pos Driver Team Points
1. Lewis Hamilton Mercedes 93
2. Nico Rosberg Mercedes 66
3. Sebastian Vettel Ferrari 63
4. Kimi Raikkonen Ferrari 42
5. Felipe Massa Williams 31