Monte Carlo champion Novak Djokovic

World number 1 Novak Djokovic chuan Tomas Berdych hnehin Monte Carlo champion nomawi a chawi a, he tour­nament-a a vawihnih champion na chiah a ni bawk.

Kuminah Djokovic hi a khel ṭha hle a, Masters pathumah a champion tawh a ni. He tianga sea­son ṭan na masters pa­thuma champion vek thei hi tunhmain an la awm ngai lo. Kuminah match 17 zet a chak tawh a ni.

Final match-ah hian Djokovic hian harsa takin set khatna chu 7-5 in a la hram a, set hnihnaah Berdych-a'n a theihtawp rawn chhuah ve lehin 4-6 in a chhuhsak ve thung a, 1-1 chiah a ni. Set hnuhnung berah erawh Djokovic hian harsatna tawk lem loin 6-3 in a la tlang nghal a ni.

Kum 27-a upa Djo­kovic hian thla hmasa khan Indian Wells leh Miami champion nomawi a lo chawi tawh a, tunah a vawi thum nan Monte Carlo nomawi a chawi leh ta a ni. Thla leh maia khelh ṭan tawh tur French Open atan pawh inrintawkn a aneih san phah hle tur a ngaih a ni.

Serbian Djokovic chuan, "Tunah hian kumina hun pawimawh ber chu a inṭan chho mek a ni. Kan hmaah khian French Open leh Wimbledon khelh tur a awm dawn a, heng tournament a chet ṭhat hi ka duhin ka tum pawh a ni. Zawi zawiin hma ka sawn zel a, eng chen nge ka thlen theih chu ka hmu zel ang," tiin a sawi.

Sawi chhunzawmin Djokovic chuan, "Kumin hi ka tan chuan kum chhinchhiah tlak tak a ni a, masters pathum a zawnin ka champion theih hi ka lawm hle. Mi la tih ngai loh a nih avangin ka tan chuan nomawi pathum a zawn a chawi hi a hlu hle a ni," tiin a sawi.