MotoGP Argentina-ah Marquez lehpelin Rossi pakhatna
Intlansiak tawp dawnah Marc Marquez a chesuala, Valentino Rossi chu tuma umphak lohin Pathianni MotoGP Argentine Grand Prix-ah pakhatna a ni. Italian rider Rossi hi tun season intlansiak pathum awm tawh aṭangin vawi hnih pakhatna a ni thei a ni.
Qualifying lama tlan ṭha Marquez-a'n pole position aṭangin intlansiak bul a ṭan a, intlansiak bul pawh a ṭan ṭha leh viau. Mahse, pariatna aṭanga bul ṭan Rossi-an lap hnih chauh tlan tur a awm tawh tihah a lehpel a, tlanpelh let ve leh a tumna lamah chesualin a intlansiak zui thei ta lo a ni.
Termas de Rio Hondo-ah ni a sat avangin tlan kawng a roin a sa hle a, intlansiak an ṭan lai hian 37 degrees lai a ni. Team tin tan tyre hman tur thlan fimkhur a ṭul hle. Yamaha rider Rossi leh Jorge Lorenzo te chuan bike ke hmaah hard an hmanga, a ke hnungah extra hard an hmang thung. Honda rider Marc Marquez erawhin hard tyre ve ve a hmang thung. Intlansiak a zawh meuh chuan Rossi tyre thlan a fuh zawk tih kan hmu.
A hmaa tlan paruk zet a lehpelh hnuah Rossi chuan lap hnih chauh a awm tawh tihin a hmasa ber a tlan mek Marquez a lehpel thut a, Marquez chuan umzui ve leh nghalin lehpelh leh nghal mai tumin turn 5-ah a rawn la leh a, mahse vanduai thlak takin Marquez hi a chesual ta a ni.
Kum 36-a upa Rossi leh World champion nilai Marquez intihpalh chungchangah hian a vannei zawka ṭang Rossi hian thiam lohna a neih hriat a ni lo a, he thlilthleng hi ennawn a nih hnuah pawh intipalh ve mai nia ngah a ni.
Ducati rider Andrea Dovizioso chu pahnihnaah a thleng a, pathumnaah Honda rider Cal Crutchlow a thleng thung. Yamaha rider Lorenzo chu panganaah a thleng ve bawk a ni.
World champion vawi sarih lo ni tawh Rossi chuan, "Chetsualna a thleng kha a pawi ka ti takzet, Marquez lakah ngaihdam ka dil e. Kan bike ke thlan a fuh avangin a vannei zawkah kan ṭang ta a ni, Marquez khan tyre a thlang fuh lo deuhah ka ngai. Hnehna ka chan avangin ka lawm em em a, mahse ka rider puiin keimah vanga harsatna a tawk kha ka inthiam lo hle," tiin a sawi.