Premier League Champions League khelh tum Man City
Premier League champion lai chu Manchester City an ni a, kuminah erawh beisei an pha lo. Champion an beisei ngam tawh lo a, an tum ber Champions League khel turin an dinhmun an siam ṭha zel.
Pathianni zan Premier League inkhelah Man City chuan Sergio Aguero goal khat thun hmangin West Ham United an hneh a, West Ham defender James Collins chuan anmahni lamah a ti goal palh bawk.
Sam Allardyce a naute hian season bul ṭan fuh viau mah se tun hniah an che chhe hle a, an match hnuhnung 12-ah vawikhat chiah hnehna an chang a ni. Khualmuala an chak hnuhnung ber chu nikum December 2 daih tawh kha a ni.
City tan Aguero
Man City chak nan a player pawimawh ber te zinga ami chu Aguero hi a ni. City tan match 159 khel tawhin goal 101 a khung a, tun season Premier League-ah a club tan goal 20 khung tawhin Premier League-ah goal khung tam ber Harry Kane nen an ni mek.
Inkhel chu
Etihad stadium-a inkhelah hian player man to leh ṭha rual Man City-in inkhel bul an ṭan ṭha zawk a, David Silva leh Aguero hmangin Hammers tlar hnung an chhaih buai nghal. Aguero-a'n ṭum hnih goal thun na hun a nei nghal a, mahse ani pawn a thun nghal thei mai bik lo. Minute 18-naah Hammers defender Collins a chesual a, anmahni lamah a ti goal palh hlauh. Collins hian Jesus Nava cross ball chu lo pet chhuah a tumna lamah tisualin anmahni lamah a ti goal a ni.
Counter-attack-ah City an hlauhawm a, first hlaf tawp hma deuhin Man City tan Aguero a rawn inlar. Argentine striker hian Navas hnen aṭanga a ball hmuh chu rang tak maiin minute 36-ah West Ham goal-ah a thun a, City-in 2-0 hmaan hruai.
West Ham lamin Enner Valencia hmangin an siphurh sut ṭhen na hun an nei a, mahse ani hian six yard box chhung aṭangin a hun ṭha neih chu a hmang ṭangkai zo lo. Goal sirah uiawm takin a pet chhuak a ni. Goal dang a luh belh tawh lo a, point 64 hmu a table-a palina dinhmun hauhtu Man City-in pangana Liverpool chu khelh khata khel tam zawk chungin point sarihin an kalsan rih a ni.
Silva hliam
City midfielder Silva chu Cheikhou Kouyate-a'n nghawk avangin field chhungah oxygen pek a ngai hial. Kouyate hi hnawhchhuah ni loin yellow card chauh pek a ni a, a vannei hle. Silva hi zawn chhuah a nih hmain field chhungah minute riat lai buaipui a ngai hial a, hemi hnu hian damdawi in panpui nghal a ni. Vanneih thlak takin Silva hliam hi a lo na lutuk lo a, first aid pek a nih hnuah damdawi in a chhuahsan leh thei a ni.
Eng nge an sawi?
West Ham boss Sam Allardyce chuan, "Goal hnih kan chhuah, kan tih sual vang ve ve a ni leh nghal a pawi hle a ni. Hun tawp lamah khan kan si phurhna hun ṭha kan nei mah se kan thun thei tlat si lo kha a buaithlak lai chu a ni. Tunlai kan khel ṭha lo a, kan insiam ṭhat thuai a ngai tawh ang," a ti.
Man City manager Manuel Pellegrini chuan, "Kan match hnuhnung berah khan Manchester United kan hneh loh avangin chak ngei tumin kan bei a, kan duh ang result ka hmu thei hi a lawmawm hle. Silava hliam kha a pawi tak zet a, refree khan hnai tak aṭangin chiang tak a a hmuh avang khan a thutlukna kha kan pawm tlan a ngai a ni.Kan inkhelh hmabakah point 15 hmuh theih ala nih avangin kan beiseina ala tawp lo a, a tawp thlengin kan bei chhunzawm zel ang," tiin a sawi.