Rajasthan chakna Rahane bawk
Pathianni a India Premier Leage inkhelah inkhel pahnih awmin inkhel hmasa zawkah Rajasthan Royals in Chennai Super Kings chu wicket riat in an hneh a, inkhel hnuhnung zawkah Mumbai Indians chuan run 18 in Royal Challengers Bangalore an hneh bawk.
Pathianni tlai inkhelah Rajasthan leh Chennai te chu Sardar Patel Stadium, Ahmedabad-ah an inkhel a, Chennai in over 20-ah run 156 vawchhuakin mi pali an hloh. Chennai tan Dwayne Bravo chuan ball 36 a hmachhawnah run 62 vawchhuakin a tawp thleng a dam.
Rajasthan-in an target hi umin harsatna an nei lo. Over 18.2-ah mi pahnih chauh hlohin an target run 157 awlsam takin an umpha a, wicket riat in chak zawkah an ṭang ta a ni. Rajsthan tan Indian batsman Ajinkya Rahane bawk a hmuhnawm leh a, ball 55 a hmachhawnah run 76 vawchhuakin a tawp thleng a dam thei. Captain Shane Watson chuan ball 47 a hmachhawnah run 73 vawchhuakin Rahane hi a thlawp ṭha hle bawk.
Mumbai Indians pawh an chak e
Pathianni zan IPL inkhelah Mumbai Indians chuan run 18-in Royal Challengers Bangalore an hneh.
M.Chinnaswamy Stadium, Bengaluru-a inkhelah hian over 20-ah Mumbai Indians-in run 209 vawchhuakin mi pasarih an hloh. Unmukt Chand-a'n Mumbai tan a khel ṭha a, ball 37 a hmachhawnah run 58 a vawchhuak. Chand hi run 59 siamtu Lendl Simmons leh run 42 vawchhuaktu captain Rohit Sharma te'n an thlawp ṭha bawk a, over 20 leka an run siam zat hi a ṭhahnem hle.
Bangalore in theihtawp chhuahin an target an um a, South Africa captain AB de Villiers chuan ball 11 lek a hmachhawnah run 41 rawn vawchhuak mah se a ṭhian te'n Mumbai tan a wicket thum la tu Harbhajhan Singh an ngam lo a, a tlawm zawkah an ṭan a ngai ta a ni.
Vawiin inkhel tur
Zanin dar 8:00 hian Sardar Patel Stadium, Motera-ah Rajasthan Royals leh Kings XI Punjab te an inkhel ve leh ang.