Kane-a'n goal 30 a thun tling ta

Tottenham Hotspurs striker Harry Kane-a ropuina belhchhahin a awm zel. Pathianni zan khan Spurs-in 3-1 a Newcastle United an hneh ṭumin tun season-a inelna hrang hranga a goal 30 na a khung, kum 1992 hnua Spurs player season khata goal 30 khung tling leh thei hmasa ber a ni.

St. James' Park-a inkhelah hian mikhual tlangnel Tottenham in inkhel an thunun tluan chhuak a, inkhel ṭan aṭanga minute 30 na lekah Nacer Chadli chuan yard 25 a hla aṭangin goal a khung a, goal dang luh belh lo in chawlhlawk an hmang.

Second half minute 46 naah Jack Colback chuan Magpies tan an siphurh rawn sut mah se Spurs in goal hnih in an chhanglet lehnghal a, Christian Eriksen chuan minute 53 naah free kick aṭanga an hmahruaina goal rawn khung lehin minute 90 naah an chakna nemnghet turin Harry Kane chuan goal a rawn khung ve leh bawk a, 3-1 in Spurs an chak ta a ni.

Kum 21-a upa Harry Kane hi kum 1992-92 season-a Gary Lineker-a'n Spurs tan goal 30 a khung hnua Spurs player zinga season khata goal 30 khung tling thei leh hmasa ber a ni. Goal 30 khung tling tur in Kane hian Spurs tan tun season-ah match 46 a khel. Premier League bikah match 29 khelin goal 20 a khung a, Sergio Aguero nen Premier League top scorer an ni mek.

Spurs manager Mauricio Po­chettino chuan, "Point thum hmuh kha kan phu a ni. Kan khel ṭha takzet a, match hnih chak lo hnua kan chak leh ta hi ka lawm a, ka player-te pawh ka lawmpui takzet a ni," a ti.