FA Cup Gerrard-a Wembley zinkawng a tawp

Pathianni zan khan Aston Villa leh Liverpool te'n FA Cup semi-final an khel a, beisei loh zawk Villa in hnehna changin Wembley-ah Liverpool chu 2-1 in an tlawm.

Season thara USA pan tur Gerrard-a tan Wembley zinkawng a tawp a, trophy nen ngeia a hmangaih Liverpool mangṭha a tumna chu Philippe Coutinho goal hmahruai hmangin chhem nun sak ni mah se Christian Benteke leh Fabian Delph te'n Villa tan an rawn chhanglet. A birthday leh FA Cup final ni nibawk May 30 a Gerrard-a'n FA Cup chawi a beiseina a thamral a, Liverpool fan te'n an beisei angin an captain atchilh rawn hi an mangṭha thei dawn ta lo.

Inkhel chu

Liverpool tan hrem vanga match thum khel tawh lo Steven Gerrard leh Martin Skrtel te'n hremna an tuar zo tawh a, Liverpool tan an rawn inlan nghal.

Inkhel an ṭan a, rinkai zawk Liverpool aiin Aston Villa an hlauhawm hmasa. Charles N'Zogbia chuan yard 25 vela hla aṭangin Liverpool goal zawnah ṭha takin a pet a, Simon Mignolet chuan ṭha takin a lo nam over hlauh. Goal khung hmasa zawktu erawh Liverpool an ni a, minute 30 naah Aston Villa tlarhnung pherh nangchingin PFA Player of the year nominee Coutinho chuan Raheem Sterling-a ball pek chu ṭha takin goal-ah a lo chan tir.

Mahse, Liverpool fan-te hlim chhung a rei lo, tunhnaia rawn che ṭha tak Villa striker Benteke chuan minute ruk hnu lawkah an si phurh sutna goal a rawn khung ve leh nghal a, match sarih Liverpool a hmachhawnah goal nga a khung ta. Team pahnihah Liverpool an khel chhe zawk a, goal dang luh belh tawh lo in half-time an hmang.

Second half-ah Liverpool in first-half a hmuh tur awm mang lo Lazar Markovic aiah Mario Balotelli an dah lut. Mahse, Balotelli tlan lutin Liverpool tan awmzia a nei thui lo a, goal khungtu chu Villa lam an ni. Aston Villa rawlthar duhawm Jack Grealish chuan amah ang tho a he inkhela khel ṭha em em mai Fabian Delph tan ṭha takin a siamsak a, Delph-a'n a tisual duh lo. Minute 54 naah Villa in 2-1 in hma an hruai.

Liverpool in theihtawp chhuahin an nawr let a, hun tawp nan minute li chiah a awm tawh tiha Gerrard-a ball tauh ṭha tak chu Kieran Richardson chuan goal line aṭangin a lo pet chhuak. Liverpool vanduai a kaltluang a, minute 88 naah Balotelli chuan goal rawn thun mah se linesman in offside a phar avangin pawm a ni lo. Replay ennawn erawh chuan Balo goal hi a offside lo tih a lang a, Reds ho in an ui vawng vawng ang. Goal dang a lut tawh lo a, 2-1 in Aston Villa chak zawkah an ṭang ta a ni.

Eng nge an sawi?

Aston Villa manager Tim Sherwood chuan, "Thil engkim kha a kaltluang a ni ber mai. Hnehna kan chan avangin ka lawm hle. Rin kai loh zawk nichungin he hmunah hian kan rawn kal a, mahse hnehna kan chan theih hi keini chuan kan inbeisei tlat a ni. Dik taka sawi chuan Liverpool kha kan ngam hle a, chance pawh kan insiam hnem hle. Final ropui takin min hmuak a, champion hi thil awlsam a ni dawn lo a ni," a ti.

Liverpool manager Brendan Rodgers chuan, "Kan hun tawn dan mila insiamrem thiam he club hian a mamawh a ni. Tun aia inkhel lian zawk tam takah kan buai hnuin kan insiam ṭha ṭhin a, zaninah erawh kan ti thei lo. Kan khelh danah kan rilru zawng zawng kan pek a ngai a, chu chu zanin khan kan ti si lo. Tunah chuan Premier League-a palina ni phak ngei tura theihtawp chhuah turin kan rilru kan sen a ngai tawh a ni. A tawp thlenga beidawng lova beih ṭhin hi he club in a kalphung a lo neih tawh ṭhin a ni," tiin an tum ber chu Premier League tawp lama a sang pali zinga tel a nih thu a sawi.