I League Second Division Vawiin aṭangin Phase 2 khelh ṭan a ni dawn

Season thara I Lea­gue khel tur zawnna chu vawiin aṭangin Gola­ghat, Assam-ah chhun­zawm a ni dawn.

Hma­hruaitu Aizawl FC-in tlai dar 3:00 hian Golaghat Stadium-ah United SC an hma­chhawn ang a; hemi rual vek hian Bokakhat Stadium-ah Chanmari FC leh Kenkre Sports te an inkhel bawk ang.

Aizawl FC Vs United SC

K. Malsawmkima enkawl Aizawl FC-in Chanmari FC nena an inkhelh ṭuma inhliam Albert Zohmingmawia leh practice-naa inhliam Lalṭhakima te an chhawr thei dawn lo.

Aizawl FC hi player pahnih vanga buai tur an ni lo. An inkhelh hmasak zawk ṭumin Aizawl FC hian United SC hi 4-2 in an hneh a, hemi ṭuma goal khungtu B.Zoramthara, Alfred Kemah Jaryan leh Justice Morgan te chhawr theihin an awm.

Aizawl FC coach Mala chuan, "Kan khelh dan tur kan la tichiang lo. Defender Emma hi awl tir a, forward-ah Justice leh Alfred te hi inkawp tir kan tum. 4-3-3 formation kan hmang a nih chuan Albert-a inhliam hi kan buai phah lo ang. Nawr vak kan tum a, chak ngei ka duh," tiin a sawi.

I League Second Di­vision-ah hian playing eleven-ah foreigner pa­hnih chiah a hman theih.

Siliguri leh Golaghat khaikhin zuiin Mala chuan, "Kanchenjunga Stadium tluk tur pitch chu tuna kan khelhna turah hi chuan a awm kher lo ang. Chutihrualin kan khelhna tur hi a ṭha pangngai hlawm a, boruak a nawm zawk avangin result ṭha kan neih zel ka beisei. Team boruak pawh a ṭha," tiin Assam-ah harsatna an neih loh thu a sawi.

Chanmari FC Vs Kenkre Sports

MPL2 champion Chan­mari FC-in I League Second Division match hmasa berah Kenkre 4-1 in an sawp nghal a; Nigerian forward Yinka Joel Sun­day-a'n goal hnih a khung bakah Malsawmfela leh F. Lalrinpuia te'n goal khat ve ve an khung.

Chanmari hian yellow card vangin V. Lalṭan­puia leh Lalruatthara-te an chhawr thei dawn lo a, player dang erawh hman theih a ni. Kenkre hian an match hnuhnung berah PIFA hneh mah se I League luhna chance an neih tawh loh avangin Chanmari FC tan hneh an harsa lo ang.