CYMA FOOTBALL Vawiin aṭangin veng leh veng inelna football ngaihhlut
Central YMA Inter Branch Football Tournament hi ṭum 17 khelh a ni tawh a, champion hmasa ber leh champion ngun ber chu Armed Veng an ni.
Vawiin aṭangin Mizote ngaihhlut CT Group Cup - 2015, Inter Branch YMA Football Tournament chu khelmual pali Lammual, Rajiv Gandhi Stadium, Ramhlun Sports Complex leh Joint YMA Field, Vaivakawnah te ṭan a ni dawn. Inelna hi Central YMA leh Mizoram Football Association-te buatsaih a ni.
Kuminah hian Branch 191 zet an inziak lut a, CYMA Football-a team tel tam ber ṭum a ni. Hemi hmaa team tel tam ber ṭum chu kum 2004-a Ramthar Veng champion ṭum kha a ni a, team 148 an tel.
CYMA Football khelh mek lai hian Mizoram football ṭhan zelna atan pawimawh zawk I League 2nd Division, I League 2nd Division U19 leh Dr TAo Football te khelh a nih bawk avangin Mizoram aṭangin team li zet an chhuak. Tualchhung football-a player ṭhate an awm loh fur avangin round tir lama result barakhaih a thleng a nih pawhin a mak lo ang.
CYMA Football hi kum 1985 aṭang khan ṭan a ni a, a ṭan kum hian Branch 32 telin Armed Veng an champion, 2015 NECS Cup khelh zawh taka champion Armed Veng hi vawi li an champion tawh.
Armed Veng kawm chhak Electric Veng hi vawi thum an champion tawh a, Chaltlang leh Dinthar vawi hnih an champion tawh a; Zotlang, Ramthar Veng, Republic Veng, Lengpui, Kanan Veng leh Ramhlun South te vawi khat ṭheuh an champion tawh bawk.
