Champions League Preview Stade Louis II-ah Juventus an lenglut dawn

Zanin dar 12:15 hian AS Monaco khelmual Stade Louis II-ah Italian champion Juventus leh Arsenal ngam loh Monaco ten Champions League quarter-final second leg an khel ang.

Kar hmasa khan Turin-ah Juve hi Arturo Vidal penalty chhuih luh hmangin 1-0 in an lo chak tawh a, zaninah goal an chhuah lo a nih chuan semi-final an lut anga, Monaco tan chuan semi-final lut turin goal thun ngei ngei a ngai thung ang.

Hmanlai chuan...

kum 1997-98 Champions League semi-final khan team pahnih te hi an lo intum tawh a, Stade Louis II-ah hian Monaco in Juve lakah 3-2 in hnehna an lo chang tawh. Mahse, inkhel pahnih belhkhawmah 6-4 in Juve an chak a, Juve striker Alessandro Del Piero chuan an khelmualah hat-trick a siam nghe nghe. Mahse, final-ah Juve hian Real Madrid an hneh lo a ni.

Juve record a ṭha

Juventus hian France club lakah hnuhma an nei ṭha hle a, European competiition-ah France club vawi 10 hma­chhawn tawhin an la chak fai vek a, zaninah hian a vawi 11 nan chak leh ngei an tum hle ang.

Monaco record ve thung

Manaco hian Italian club lakah hian hnuhma an nei ṭha rih lo viau a, European competiition-ah Italian club vawi ruk hmachhawn tawhin vawi khat chiah hnehna an la chang thei a ni. He an record ṭha lo tak hi zaninah hian thai chhiat an tum dawn a, inkhel hmuhnawm tak kan hmuh a beiseiawm.

Tun hnai boruak

France club Monaco hian an game hnuhng berah Rennes chu 1-1 ina n inhnehtawk pui a, an game hnuhung paliah vawi thum lai draw result an nei a ni. Ligue 1-ah pathumna ni mekin point 59 an hmu mek a, hmahruaitu Lyon nen point rukin an inthlau mek.

Italian club Juventus hian an match hnuhnung berah Lazio chu 2-0 in an hneh. Serie A table-ah hmaruaitu niin anmahni hnaih ber tu Lazio nen point 15 zetin an inthlau tawh a ni. Match sarih khelh hmabak la awmah an dinhmun a ṭha tawh hle.

Juve hian inhliam vangin star player Paul Pogba an la chhawr thei lo anga, mahse Coach Massimiliano Allegri-a'n kar tawp inkhel a hahchawlh tir Alvaro Morata, Roberto Pereyra leh Stephan Lichtsteiner te an inlan tur a ngaih a ni.

Monaco lam pawhin an player pawimawh midfielder pahnih Geoffrey Kondogbia leh Jeremy Toulalan te an chhawr thei dawn lo a, anni aiah hian Layvin Kurzawa leh Fabinho te an luh rin a ni.

Eng nge an sawi?

Monaco manager Leonardo Jardim chuan, "Team khauh leh inrem fuh tak kan hmachhawn dawn avangin kan fimkhur a ngai leh dawn, midfielder pawimawh pahnih kan chhawr theih dawn loh avangin kan inrem fuh a ngai hle ang. Kan khelmuala khel tur kan nih avangin kan zam lo. Minute 90 chhungin eng nge lo thleng dawn kan la hre lo a, engmah thil chiang a la awm lo," tiin a sawi.

Juventus manager Allegri chuan, "Goal chhuah loh kan tum ang, mahse goal chhuah loh kan tum vangin kan nawr dawn lo tihna erawh a ni chuang lo. Fimkhur takin semi-final thleng ngei turin kan bei ang. Ka player zingah tawnhriat ngah tawh tak tak an awm avangin kan ṭhatpui ka beisei," tiin a sawi.