Liverpool kaihruai turin Rodgers a tling tawk em?

Nikum tun ang hunah hi chuan Liverpool fan te'n champion an sawi ri a, Norwich City chu 3-2 a hnehin match thum chiah khelh hmabak an nei tawh a, table-ah point nga laiin hma an hruai fal.

Kuminah erawh an striker chhuanvawr Luis Suarez-a'n Barcelona a pansan a, table-ah pangana ni mekin Champions League khelh phak leh phak lohah an buai mek.

Captain Steven Gerrard-a'n season tharah LA Galaxy a zawmsan dawn avangin champion nomawi pakhat tal nena thlah an duh. Mahse, an beiseina neihchhun FA Cup semi final-ah Aston Villa hneh lo in an tla a, nomawi pakhat pawh chawi lo a season an mangṭha a ṭul dawn ta a ni.

Nikuma EPL nomawi khawih thuak thuak hman Brendan Rodgers-a'n record duhawm lo a siam a, chu chu kum 1950 hnua Liverpool manager zinga season thum chhung eng trophy mah a team chawipui lo hmasa ber a ni. Nikuma Liverpool a enkawl ṭhat zia kha phat rual a ni lo, mahse tun season-a Liverpool a kaihhruai dan en erawh chuan Rodgers hi Liverpool enkawl zel turin a tling takzet em? tih hi zawhna awm thei a ni ta.

Tunge Rodgers chu?

Irish pachal kum 42-a upa Rodgers hian Chelsea youth team leh reserve team lo enkawl tawhin Championship lamah Watford leh Reading a lo enkawl tawh bawk a, a hming rawn chher ṭanna tak erawh Swansea City a ni thung. Rodgers hian Welsh club hi Premier League-a a hlankai mai bakah relegate leh mai tura an ngaih team kha Premier League team vantlangah a hlangkai a, season thar an chuankai meuh chuan Premier League club ropui ber pawl Liverpool in an team tluchhe mek tungding turin an la lut.

A season hmasa berah Rodgers-a'n beisei angin Liver­pool chet ṭhat pui lo mah se a season hnihnaah erawh Premier League team hlauhawm ber pawlah a hlangkai a, attacking game hmuhnawm tak lan tir in 2013-14 season-ah goal 101 an khung a, 1895-96 hnua Liverpool in season khata goal an khung hnem ber a ni. Premier League chanchina season khata goal khung hnem ber pathumna an ni bawk. Rodgers hi LMA Manager of the Year-ah thlan a ni bawk a, kum 20 hnua Liverpool manager he lawmman dawng thei hmasa ber a ni.

Tunge mawhpuh tur?

Liverpool-a a khelh laia season nga chhung champion team a tel thei Mark Lawrenson chuan, "Players naupang kawl hnem lutuk chuan khelh ṭhat leh khelh chhiat hi a in chhawk reng mai a ni. Daniel Sturridge-a inhliam hi an tuar takzet niin a lang a, Costa tel loa Chelsea khel in beisei a phak lo ang chiah hi a ni," tiin striker ṭha dang Liverpool in an nei lo chu result ṭhat loh chhanah a puh.

Liverpool manager hlui Roy Evans chuan, "Players tam tak an lalut ringawt a, Luis Suarez thlak zo an awm si lo," tiin players vantlang lakluh ṭeuh rikngawt chu pawi a tih thu a sawi.

Gerrard-a khelh

Ṭhat loh chhan?

A vanglaia khawvel club ṭha ber ber Real Madrid, Chelsea leh Bayern Munich te meuh pawhin lakluh an tum kha a ni a, Gerrard ṭhat zia hi phat rual a ni lo.

Mahse, a kumin tam lam a pan ve zel a, hman kha a phak tawh loh tih chu a khelah a langchhuak. Rodgers-a'n Gerrard hi regular a khel turin a mamawh tawh lo niin a hria a, Liverpool tan a hun pum hman a duh vanga England captain nichunga international football chawlhsan tu hian USA a pan phah dawn.

Liverpool player hlui John Scales chuan, "Gerrard hian awihawm loh khawpa ṭha in Liverpool tan a lo khel tawh ṭhin a, season laklawha a chhuah tur thu tih chian a ni ta mai hian a rilru lam thlengin nghawng a nei a ni," tiin Gerrard-a khelh chhiat chhanah USA a pan tur chu a puh.

Liverpool player hlui tam zawkin Rodgers-a'n tun season-a Gerrard a enkawl dan an sawisel a, team chawkphur tu ber Gerrard a rilru lam a hnual miau avangin beisei an phak lo niin an sawi.

Rodgers aiah Klopp maw?

Tunhnaiah Borussia Dort­mund manager hlawhtling Jurgen Klopp-a'n a team enkawl lai sea­son tharah a chhuahsan tur thu a tichiang tawh a, media ṭhenkhat chuan Liverpool zawm tur angin an chhuah leh der tawh.

Liverpool neitu Fenway Sports Group hi Jurgen Klopp duh em em ṭhintu a nih avangin thuthang pawh hi a awm lo hran lo. Mahse, tun dinhmunah chuan Rodgers hi an ban mai ala rinawm loh hle. Rodgers hi an ban a nih ngat chuan zangnadawmna pound maktaduai 10 lai an sen a ngaih dawn mai bakah manager thar ruai turin hetiang zat bawk hi an sen a ngai dawn.