Depay leh Man United an inhnimhnai
Dutch champion PSV Eindhoven chuan an champion na kawnga player thawhhlawk tak Memphis Depay chu Manchester United in lei tuma an dawr thu an puang.
PSV technical director Marcel Brands chuan Dutch Television hnenah, "Phone in Depay-a chanchin hi Old Trafford aṭangin min rawn zawt tawh a ni. Inbiakna mumal tak erawh kalpui a la ni lo a, club lian tak tak amah duhtu hi an tam hle a ni," a ti.
Kum 21-a upa Depay hian Dutch League Eredivisie-ah kum 2008 hnua a vawikhat nan PSV chu a champion pui a, goal 20 khung tawhin Eredivisie-ah top scorer a ni mek.
Liverpool pawhin an rim mek nia an sawi Dutch Winger hi season ṭan dawn khan Tottenham Hotspur-in pound maktaduai 14.4 in an lo rim tawh a, PSV lamin hetiang zat leka chhuah hi an phal lo.
PSV technical director Brands chuan, "Spurs-in an rawn rimna man zat nena tehkhin kha chuan a man hi a to dawn hle a, to tak lo chuan hralh kan phal lo a ni," tiin Depay duhtu chu an insen ve nual a ngaih tur thu a sawi.
Inrinni liam ta a an champion na nemnghet tura PSV-in Heerenveen 4-1 a an sawp zawh hnu lawkin PSV coach Phillip Cocu-a chuan season tharah Depay chu an hnenah a cham tawh lo tur thu a lo sawi tawh a, an midfielder pawimawh Georginio Wijnaldum pawh season thara a chhuah tur thu a sawi tel bawk.
Depay hi 2014 Brazil World Cup-ah khan Netherlands tan khelin Europe club lian ho chil a ti put hle a, Eredivisie-ah a chet ṭhat chhunzawm bawk nen a man hi season hmasa ai kha chuan a sang tawh zawk hlein a rinawm.