Aston Villa danglamna thlentu Tim Sherwood

February thlaa Aston Villa-in an manager Paul Lambert-a an ban khan Premier League aṭanga relegate mai thei dinhmunah an ding hman. Mahse, season hmasa a Tottenham Hotspurs-in an ban hnu Tim Sherwood an lalut a, Premier League-ah him lam an pan mek zel bakah FA Cup final hial an lut ta.

'Tactic Tim' tia a hminglem an vuahsak hian FA Cup semi final-a Liverpool an hneh ṭumin a team a rawn remkhawm fuh a ni mai lova, team ṭha zawk minute 90 chhung Wembley-a an thunun thei kha a thluak ṭhat zia pholang tu a ni.

Sherwood hian team remkhawm a thiam satliah a ni lo a, player naupang zawk leh tawnhriat nei tlem zawk te chher hriam a thiamin anmahniah inrintawkna nasa tak a siam sak ṭhin. Chu mai a ni lo, player ṭhenkhat an thiamna anga khel chhuak zo lo te an theihna ang taka khel tura puih hi a thil thiam em em a ni bawk.

Spurs a enkawl lai khan Sherwood hian player naupang tak tak Harry Kane, Nabil Bentaleb leh Ryan Mason te khelhna chance pe in a hrual ṭhin a, tun season-a an team tan an ṭangkai tawh zia leh puitlin zia chu hrilh nawn kan ngai lo. Hetiang chiah hian Villa-ah pawh Sherwood a luh hmaa bench luahlum ṭhin kum 19 leka upa Jack Grealish chu Sherwood hian beisei loh takin match pawimawhah a chhawr leh ṭhin a, Liverpool an khelh ṭuma Irish midfielder khel ṭha zet hi tunah chuan EPL rawlthar zinga player hmuhnawm ber pawl a ni leh der tawh.

Andre Villas-Boas hnuaia match khat chiah khel Adebayor pawh Sherwood-a'n Spurs a enkawl hnu in a ringtawk a, match 20-ah goal 11 a khung thei. Villa-ah pawh Sherwood-a'n a hnathawh dan a thlak lo, Paul Lambert hnuaia match 18-a goal 3 chiah khungtu Benteke-a'n Sherwood hnuaiah harhtharna a chang a, Sherwood-a'n Aston Villa a enkawl hnuin match 10-ah goal 10 a khung ta. Benteke chet ṭhat hi tunhnaia Villa result thlak danglam tu ber a ni. A chet ṭhat chhanah Belgian striker chuan a pu Sherwood chu puhin, " Villa a lo luh hnuah nasa takin mi pui a, keimahah inrintawkna min siamsak a ni," a ti.