Kan tyre thlan fuh vang a ni - Rossi
Yamaha rider Valentino Rossi chuan Argentine Grand Prix a hnehna a chan theih chhan chu a tyre thlan fuh vang a nih thu a sawi.
Pathiannia MotoGP intlansiakah khan pariatna aṭanga bul ṭan Rossi chu pakhatna a ni thei a, hei hi mi tam takin a thiam leh bike chak vang hrim hrim niin sawi mah se bike ke hma a hard tyre a hman vang leh a ke hnung a extra hard a hman chu a chak chhan a nih thu a sawi ve thung a ni.
Argentina a pakhatna a nih kha Rossi-a'n podium vawi 199 a luahna chiah a ni a, heng zingah hian vawi 110 zet chu pakhanna a ni thei. Yamaha bike khalh chunga hnehna vawi 51 a channa chiah a ni bawk.
Tun season intlansiak pathum aṭangin Rossi hian point 66 hmu tawhin hmahruaitu a ni mek a, pahnihnaah Ducati rider Andrea Dovizioso awmin point rukin an inthlau mek a ni. Champion lai Marc Marquez erawhin beisei ala phalo a, point 36 hmu tawhin pangana a ni mek.
Kum 39-a upa Rossi chuan, "Pathiannia hnehna kan chang thei kha a lawmawm hle, intlansiak tlankawng kha a lum deuh avangin tyre thlan fimkhur a ngai a, Marc Marquez-a'n hard tyre ve ve a hmang ka hmuh khan a tir lamah tlan vak a tum a ni tih ka hre thei mai a, chutiang pawh chuan a ti reng a ni. Mahse, a tawpah chuan a vanneiah kan ṭang a, hard leh extra hard tyre hman kha a lo fuh zawk a ni," a ti.
Sawi chhunzawmin Rossi chuan, "Qualifying-ah ka tlan ṭhat loh avangin pariatna aṭangin bul ka ṭan chauh a, corner hmasa berah ka chesual lek lek bawk. Mahse zawi zawi a hma sawn chho zelin Marc hnung chiaha ka tlan tawh kha chuan pakhatna nih theih ka inring tawh a, ka beisei ang ngeiin hnuṭha ka hmuh chhun ka hmang ṭangkai a ni," tiin a sawi.