Guardiola-a'n chhuah mai a tum lo

Manchester City nena an sawi zawm Bayern Munich manager Pep Guardiola chuan Premier League club enkawl a la tum lo, a contract neih lai hman zawh a duh.

Barcelona manager hlui Guardiola chuan, "Ka hmalam hun chu : Nilaini kan awl, Ningani training a ni a, chuan nakkumah hetah hian ka la cham bawk ang," tiin chhuah mai a la tum loh thu a sawi.

Guardiola hian Germany-a season hmasa berah Bundesliga bakah cup pahnih a chawi nghal a, tun season-ah nikuma a record tluk pha thei dinhmunah a ding zel.

Bayern Munich-in Guar­diola luh hma kumin Bundesliga, Champions League leh DFB Pokal-ah an champion a, German club zinga treble champion hmasa ber an ni.

Guardiola chuan, "Bayern Munich, Real Madrid leh Barcelona te anga club lian chu treble champion-ah chauh an lawm a, kan chak chuan fing nih kan hlawh a. Kan chak loh erawh chuan nasa taka sawisel kan ni a, kan hnaah harsatna kan nei bawk, chu chu kan dinhmun a ni. Ka club awmna hi ka hria a, Bundesliga leh Cup ringawta lawm chi an ni lo," tiin a dinhmun a hrechiang hle.

Bayern Munich hian nizan khan FC Porto nen Champions League quarterfinal-ah an inhmachhawn a, result kan hre hman lo.

Barcelona-a hmingṭha Pep Guardiola hian Bayern Munich-ah harsatna a nei ve tho a, tun hnaia langsar tak chu team doctor Hans-Wilhelm Muller-Wohlfahrt ban chungchang kha a ni.

Muller-Wohlfahrt kha kum 72 a upa ni tawh mah se kum 38 chhungin infiammite career vawi tam a lo chhanhim tawh a, chutiang zingah chuan Michael Owen leh Jamie Redknapp an tel a. A enkawl zingah infiammi langsar Jurgen Klinsmann, Usain Bolt, Steven Gerrard, Jose Maria Olazabal, Will Greenwood, Paula Radcliffe, Dame Kelly Holmes, Giorgio Chiellini, Darren Gough leh Maurice Greene te an tel a, dah hniam theih a ni lo.

Porto an hneh loh zawha Guardiola ṭawngkam vangin Muller-Wohlfahrt kha a bang a, mahse Spanish manager hi a hnu lamah a insawifiah leh tho. Guardiola chuan, "Inhliam chu inhliam a ni. Doctor thiam loh a awm lo. Dam kim pawh ni ila chak lo thei tho kan ni," tiin a sawi.

Muller-Wohlfahrt rual hian a fapa Kilian bakah assistants Peter Ueblacker leh Lutz Hansel te an chhuak tel a, Bayern team boruak chhiat phah mah se Guardiol hna erawh a khawih pha lo.

Bayern chairman Karl-Heinz Rummenigge-a'n Guardiola an ban loh tur thu a sawi a, kum 2016-a a contract tawp hunah erawh Jupp Heynckes ang thoin a contract a pawtsei lo thei. Chumi hunah chuan Manchester City tan Guardiola hi a beisei theih ang, tunah rih chuan Premier League champion lai hian Manuel Pellegrini rin zel emaw season thara club enkawl tur la nei lo Jurgen Klopp dawr emaw chu an beisei theih sang ber a ni.