Kolkata in Delhi an ngam

India Premier League Thawhṭan zanah Delhi Daredevils leh Kolkata Knight Riders te'n an khel a, mikhual team Kolkata in wicket ruk in hnehna an chang.

Feroz Shah Kotla, Delhi-a inkhelah hian bat hmasa zawkah mual neitu Delhi Daredevisl an ṭang a, over 20-ah run 146 vawchhuakin mi pariat an hloh. IPL-a hlawh hnem ber ni mek Yuvraj Singh-a'n beisei a phak lo chhunzawm zel a, ball 19-ah run 21 a vawchhuak hman chauh tihin a out.

Kolkata in an target run 147 umpha turin harsatna an tawk lo a, over 18.1-ah run 147 vawchhuakin mi pali chiah an hloh a, wicket rukin hnehna an chang ta a ni. Captain Gautam Gambhir-a'n India senior team a tel a phu zia rawn tilangin ball 49 a hmachhawnah run 60 a vawchhuak a, Yusuf Pathan chuan ball 26 lekah run 40 vawchhuakin inkhel tawp thleng a dam bawk a ni.

Naktukah IPL inkhel pahnih hmuh tur a awm leh dawn a, inkhel hmasa zawk tlai dar 4:00-ah Sunrisers Hyderabad leh Kolkata Knight Riders te ACA-VDCA Stadium, Visakhapatnam-ah an inkhel anga, zan dar 8:00-ah Royal Chal­lengers Bangalore leh Chennai Super Kings te chu M.Chinnaswamy Stadium, Bangalore-ah an inkhel leh bawk ang.