I League Second Division Chesual nawn Aizawl FC an vannei

MPL3 champion Aizawl FC-in hmahruai belhchhahna hun ṭha an bawhpelh a, nimin zing khan United SC nen goal awm loin an in draw. Amaherawhchu tlai inkhelah Lonestar Kashmir FC-in Kolkata club Mohammedan SC an hneh lo a, Chanmari FC leh Kenkre te ruahsur vanga an inkhelh zawh theih loh bawk avangin I League Second Division-ah Aizawl FC in hma an hruai chhunzawm a, an falna hi point thum a tling ta.

Aizawl FC an vanduai

Siliguri game hnuhnung berah Aizawl FC-in an elpui Chanmari FC an hneh lo. Golaghat, Assam-a an game hmasa berah MPL3 champion hian goal an khung thei lo a, Kolkata club United SC nen an inhnehtawk.

Aizawl FC-in 4-3-3 formation an hmang a, keeper-ah Zothanmawia awmin, defence-ah Lalrozama, Lalramchullova, Toky Zomuanpuia leh Immanuel HS Lalthazuala te an intlar a, midfield-ah R. Malsawmtluanga, H. Lalbiakthanga leh captain David Lalrinmuana te an awm a, forward-ah foreigner pahnih Alfred Kemah Jaryan leh Justice Morgan bakah William Lalnunfela te an awm bawk.

Golaghat-ah floodlight ṭhat loh avangin inkhelh hun tih danglam a ni a, tlaia inkhel tur Aizawl FC chu zing lama khelh tir an ni. Ruahsur vangin field a nal a, Aizawl FC-in ṭum danga an game an pha lo.

Chutihrualin Aizawl FC hian vanduai ṭum chu tawng lo se chak tur an ni. Liberian forward Alfred-a'n crossbar ṭum hnih a pet per a, captain David-a goal khung tur chu tluk sual vangin Alfred hian goalline aṭangin a lo dan sak bawk. Aizawl FC hian chance ṭha tak tak an nei a, goal an khung theih loh avangin Siliguri-a 4-2 a an hneh United SC nen an inhnehtawk.

Aizawl FC coach K. Malsawmkima chuan, "Ṭum dang kan pha lo a, kan vanduai tel bawk. Amaherawhchu hmahruaitu kan la nih tho avangin I League khelh hi kan kutah a la awm chhunzawm zel, match ruk khelh hmabakah result ṭha neih tumin theihtawp kan chhuah ang," tiin a sawi.

Ruahsur tihbuai Chanmari

Bokakhat Stadium-ah ruah sur vangin minute 40-a inkhel tih khawtlai a ni. Inkhel ṭan a nih hnuah Chanmari FC-in Malsawmfela hmangin minute rukna lekah hma an hruai nghal a, Sawmfela goal hi a kawh ṭha hle.

Chanmari-in inkhel thunun chung siin goal an khung thei lo a, first half tawp hma hretin penalty an chawi zui a. Minute 42-naah Kenkre-in penalty an hmang ṭangkai a, halftime-ah 1-1 a ni.

Second half-ah Chanmari FC winger Laldingngheta chu penalty area-ah tih tluk ni mah se penalty pek a ni lo a, ruahsur vangin khelh zawh theih a ni lo. Vawiinah chawhnu hian khelh hmabak minute 13 khelh chhunzawm a ni ang.

Chanmari FC coach H. Vanlalthlanga chuan, "Ruahsur vangin khelhna hmun a ṭha tawk lo a, chutihrualin kan khingpuite pawh ground chhiaah tho an khel a, an vanneih zawkna chu keini aiin an lian zawk a, an chak zawk a, ground ball khel ṭhin tan chuan a harsa a ni. Khua a ṭha ang a, Pathian zarah kan khelh hmabak minute rei loteah hian kan chak ngei ka beisei," tiin a sawi.

Inkhel dangah Lonestar Kashmir-in Ajay Singh hmangin minute 31-naah goal khung hmasa mah se Mohammedan Sporting Club-in second half-ah Sandeep Sangha leh Daniel Bidemi hmangin an lehthal. Table hnuai lam inkhelah Hindustan-in PIFA 1-0 in an hneh bawk.