Champions League Preview Semifinal lut tur zawnna Madrid Derby
UEFA Champions League quarterfinal chin tawh chu a hmuhnawm a, derby boruak awm tel hi zanin dar 12:15-a Madrid derby ngaihnawmna belchhahtu a ni. Kar liam ta khan Vicente Calderon-ah goal awm loin Real Madrid leh Atletico Madrid te an inhnehtawk a, zanina an inkhelhna tur hi Santiago Bernabeu a ni.
Nikum Champions League final-ah Real Madrid-in an hmelma Atletico Madrid hi 4-1 in an hneh a, insawp angin lang mah se hun pangngaiah an inhnehtawk a, extra time khelh a ni.
Tun season-ah ṭum sarih zet an inkhel tawh a, Carlo Ancelotti enkawl Real Madrid-in chak an la nei ve lo. Season ṭan tirhah Atletico Madrid-in Spanish Super Cup-ah Real hnehin nomawi an chawi nghal a, league match pahnihnaah an chak ve ve bawk. Copa del Rey Round of 16-ah an inkhel a, Atletico hneh loin Real an tla.
Zanina an inkhel tur hi tun season-a an vawi riat inkhelhna tur a ni a, hemi hma chiaha goal awm loa an inhnehtawk avangin Santiago Bernabeu-a goal awma an inhnehtawk a nih chuan Atletico Madrid zawk hi semifinal lut tur an ni.
Real an buai
Champion laiin tlar hmaah Cristiano Ronaldo, Gareth Bale leh Karim Benzema te an chhawr ṭhin a, attacking trio zingah Ronaldo chiahin Atletico a hmachhawn thei dawn. Benzema leh Bale bakah playmaker Luka Modric a tel thei dawn lo bawk.
Player pawimawh inhliam hi Jese Rodriguez leh Javier Hernandez te tan hun ṭha a ni. Manchester United aṭanga loan-a lut Chicharito hian khelhna hmun a chang meuh lo mah se goal nga a khung ve tawh. Rin loh takin zanin hian Real player pawimawh a ni thei ang.
Real midfielder James Rodriguez chuan, "Atletico tlar hnung hi a phui ṭha a, dawh theihna an neih bawk avangin khelhpui an harsa hle. Amaherawhchu kan stadium-ah min ṭantute hmaah kan khel dawn a, concentration kan hloh loh chuan result ṭha tak kan hlawhchhuak thei a ni," tiin a sawi.
Torres ngaihdan
Real inhliam chungchang sawiin Atletico forward Fernando Torres chuan, "Team tinin player pawimawh an nei vek a, Real-ah player ṭha an tam avangin tuna inhliam hi kan tana ṭhatna a tam lo. Real hneh tur chuan theihtawp chhuah a ngai a, away goal rule dan hmanga kan dinhmun a ṭhat theih dawn avangin attacking football kan khelh ngei ka ring," tiin a sawi.
Real-in Cristiano Ronaldo an nei a, Atletico-in Antoine Griezmann an nei ve bawk. Griezmann hian Atletico tana a season hmasa berah goal 20 a khung tawh a, zaninah player pahnih hi an hmuhnawm ang.