Vawiin tlai dar 3:00-ah MPL11 quarterfinal

LZ Juice MPL11-ah vawiin tlai dar 3:00 hian SYS FC leh Chawnpui FC te an inkhel dawn a, semifinal beiseina nei sang pahnih inkhel a nih avangin quarterfinal tia chhal theih a ni.

Chawnpui FC hian an match hnuhnung berah Chanmari FC kim lo lakah point khat chauh an hmu a, SYS FC pawhin Mizoram Police lakah 2-0 in hma hruai mah se an hum zo lo. Team pahnihin an match hnuhnung berah point khat ve ve chauh an hmuh avangin vawiina an inkhelh turah chak ngei an mamawh.

Chawnpui leh SYS hi an intawn hmasak ṭumin 1-1 in an inhnehtawk a, chutihrualin an inkhelh ṭum hi July 12, Zirtawpni daih a nih tawh avangin an inkhelh tawhna aṭanga ngaihdan siam a rem lo. SYS hi la danglam tam lo mah se Chawnpui erawh coach Lalrindika hnuaiah harhtharna an chang a, relegate thei team khan semifinal beiseina an nei tawh.

Team pahnih attacking game an khelh a ṭul dawn a, coach pahnih Rindika leh Lalmuankima ten awmze neia an player-te an rem ṭhin avangin inkhel class pawh a sang ngei turah a ngaih theih.

Chawnpui hian goal khung thei bik player an nei lo a, goal khung tam ber Lalthanzuala'n (TZ-a) goal thum chauh a la khung. SYS lamah Ricky H. Vanlalhriatsanga, Mesak C. Lalrinngheta leh Andreas Lalhmingmuana ten goal thum ṭheuh an khung tawh a, goal khung tlem tih tur chu ni lo mah se top scorer an beisei pha lo vek.