I League 3: Chanmari an chak nghal

Mizoram Premier League club Chanmari FC-in I League 3 final round-a an match hmasa berah hnehna an chang nghal a, RG Stadium, Aizawla an hneh tawh hnu GMSC-MYJ chu 2-0 in an hneh.

Chanmari tan KC Malsawmsanga leh Lalrokima ten goal khat ve ve an khung a, Mumbai club-in a chhanletna tur an neih loh avangin Mizo club an chak - Chanmari tan I League 2 a hnai leh ta sawt.

Nimin khan group B inkhel hmasa zawkah Abbas Union FC leh Dalbir Football Academy te 1-1 in an inhnehtawk a, Dalbir tan Tanveer Singh chuan goal hmahruai khungin, Abbas tan Syed Abid Hussain Razvi chuan si phurh a sut.

Hei le Chanmari

Kalyani Stadium-a inkhelah Mizo club-in chak tumin an khel a, an hneh tawh hnu GMSC hi na takin an nawr - minute 35-naah CFC hian goal an khung ta nge nge a, KC Malsawmsanga'n hnai set sawtah chiang zetin a khung.

Sawmsanga goal khung theih nan full back Ephraim Lalremtluanga'n mual sir aṭangin Lalkhawpuimawia (Mapuia) chu ball a pe a, NorthEast United striker hlui hi amah vengtu Syed Kehan Hussain-a lak aṭangin a tal put a, box chhungah a thlawh lut.

Awmna tur taka lo awm Sawmsanga'n hnai set sawt aṭangin goal-ah a lo chantir a, Mumbai Premier League champion keeper Paramjit Baghel tan tih theih a awm lo.

Rokima goal mawi

Kolkata khawpuiah khaw lum avangin water break neih a ngai ṭhin a, heti chung hian Mizo club-in chak tumin attacking football an khelh chhunzawm - minute 50-naah goal mawi bik kan hmu.

Joseph Lalvenhima ball thlawh luh chu goalkeeper Paramjit-a'n tlan chhuakin a tauh chhuak a, mahse, hei hi attacking midfielder Rokima ke bulah a tla - Lengpui tlangval hian meng kar chungin Paramjit a 'chip' khum a, goal mawi bik a ni.

GMSC an tho leh tawh lo. Aizawl khawpuia an hneh loh Chanmari kha Kolkata-ah pawh an hneh chuang lo a, Mizo club an chak - group aṭang hian a sang pahnih chu I League 2 khel turin an tling dawn a, Abbas leh Dalbir an in draw bawk si avangin CFC tan match khatna aṭangin kawng a inhawng zau nghal.