Pep-a'n League Cup ngai pawimawh dawn lo

Manchester City chuan League Cup third round-ah Championship club Watford chu 2-1 in an hneh a, Thawhlehni zan inkhelah Jeremy Doku leh Matheus Nunes ten goal an khung.

Etihad Stadium-a inkhelah Doku-a'n minute ngana lekah Jack Grealish hnen aṭanga a ball hmuh chu mawi taka a virpui hnuah a pet goal. City an chungnung zawk a, Matheus Nunes-a'n minute 38-naah box pawn aṭangin ṭha zetina pet goal leh bawk.

Watford-in goal hnih an chhuah hnuah huaisen takin an nawr a, goal chance pawh an insiam. Minute 86-naah Paul Ince fapa Tom Ince-a'n mawi zetin a pet lut a, City nuamsain an chak lo.

Inkhelh banah Pep Guardiola chuan, "Round lehah chuan second team kan khelh tir dawn. League Cup-ah tha thlawn sen kan tum lo. Chutihrualin chak loh kan tum tihna a ni lo a, Premier League leh Champions League kan ngai pawimawh tihna a ni zawk," tiin League Cup an dah pawimawh loh tur thu a sawi.

Spanish manager Pep hian League Cup hi dah pawimawh tawk lo mah se ṭum li zet a champion tawh tho a, record a nei ṭha hle.