Varane-a'n inkhelh a chawlhsan

Real Madrid defender hlui Raphael Varane chuan kum 31 mi lek ni chungin inkhelh a chawlhsan thu a puang a, France tana World Cup nomawi pawh lo chawi tawh defender hian a khup hliam vangin inkhelh zui zel a tum tawh lo.

Varane hian nipui lai khan Italian club Como chu Manchester United aṭangin free transfer-in a zawm a, thla hmasa khan Sampdoria lakah a match hmasa ber khelin a inhliam nghal - French defender hian chawl turin thutlukna a siam ta law law a ni.

French defender chuan, "Thei leh thei loa football khelh reng ai chuan, inchhuang tak chunga he game thlah hi ka thlang zawk a ni. Ka rilru leh suangtuahna te tihlawhtling tura he thutlukna siam tur hian huaisen a ngai hle," a ti a, inkhelh chawlhsan tura thutlukna siam chu thil awlsam a nih loh thu a sawi.

Varane hian French club Lens aṭanga a professional zinkawng zawh ṭanin, season khat chauh a khelh hnuah, kum 2011 khan Real Madrid a zawm. Spanish club-ah hian hlawhtlinna ropui tak chharin, La Liga (3), Copa del Rey (1), Supercopa de Espana (3), UEFA Champions League (4), UEFA Super Cup (3) leh FIFA Club World Cup (4) ah a champion pui.

August 2021 khan match 360 khela goal 17 a khungna Real chhuahsanin United a zawm a, hetihlaia a man zat hi pound maktaduai 34 niin, £42mtd thleng sang chho thei tura tih a ni. Mahse, English club-ah beisei angin a hlawhtling lo - hliamin a tlak buak ve reng a, season thum chhunga match 95 chiah khelin, FA Cup leh League Cup-ah a champion.

Varane hian kum 2013 khan France tana a match hmasa ber khelin, match 93 a inlansak a, World Cup 2018 champion team-ah a tel; an champion nana player pawimawh a nihzia pholangtu chu FIFA World Cup Dream Team leh FIFA FIFPro World 11 2018-a a lang chu a ni.

French defender chuan, "Vawi tam tluin ka tho leh tawh a, tunah erawh, ka nomawi chawi hnuhnun ber pawh Wembley-ah ngei ni chungin ka tawp hun a thleng ve ta," a ti a, United tana a match hnuhnung bera FA Cup champion an nih a sawi lang.

Varane chuan, "Inchhirna engmah ka nei lo a, engmah kha ka thlak danglam lo ang. Ka beisei phak bak nomawi ka chawi a, mahse, khang chawimawina leh nomawi piahlamah khan ka kalna hmun apiang, ropui taka hnutchhiah a, kalsan kha ka tum ṭhin - in lawmna ka thlen ṭheuh ka beisei," a ti a, Como-ah hian management team-ah a tel zui ang.