Goal khung nuam ti Chelsea

Christopher Nkunku-a hattrick hmangin Chelsea chuan Barrow 5-0 in an sawp a, nuamsa takin Carabao Cup third round an paltlang - Enzo Maresca nauten tun hnaia goal khung nuam an tiin anmahni goal an venghim ṭha hle.

Thawhleni zana Blues inkhel a hmuhnawm - Nkunku bakah hian Joao Felix-a freekick chu Barrow goalkeeper Paul Farman-a'n anmahni lama a tih luh bakah Pedro Neto chuan goal khat dang a thawh ve bawk.

Inkhel dangah Aston Villa chuan Wycombe Wanderers chu 2-1 in an hneh hneh ve bawk. Villa tan League One club lakah Emi Buendia leh Jhon Duran te chuan second half-ah goal khat ve ve an khung a ni.

5 Star Chelsea

An inkhelhna hmun chu Stamford Bridge a ni a, mualneitu hi team ṭha zawk an nih sa bakah an khingpui hi League Two club an ni a, fourth division lama inlan tan khualmuala Blues luhchhuah chun thil harsa tur a ni tih a chiang nghal.

Minute riatna lekah goal kan hmu nghal, forward Felix chuan a hmaa player pahnih dingte chu a chip khum keuh a, ball kang sang hi lei a thlen hma in Nkunku chuan a lo pet nghal, goal sirah lamah kalin keeper Ferman a che hma lo.

Blues hmunawm zuiin mual sir aṭanga Malo Gusto-a cross chu Nkunku pawhin a lo keng lut mawi ngang mai, a hnaiin a rang bawk si - minute 15 an khelh tlin chuan League Two club Barrow hian goal hnih an chhuah fel der tawh.

Enzo Maresca nauten an la duhtawk mai lo - Felix chuan awlsam hmel tak, mahse thil awlsam ni miah si loin freekick a pet a, ball chuan goal ban a per. Ball per hian keeper Ferman hnung lam per zuiin anmahni lamah a lut a, chawlhlawk hmain chak tur a chiang.

Second half tir lamah Chelsea hian na takin an nawr leh thut. Forward Mykhailo Mudryk chuan chak taka ball a tlanpui hnuah Pedro Neto tan a siamsak thut a, ani hian London club tana a goal hmasa ber chu harsatna nei loin a lo khung.

Hun tawp dawm lamah Nkunku goal thumna kan hmu. Goalkeeper Ferman-a'n ball pet chhuah mai tur a ti ding a, tlan sawn pui a tum chu Nkunku-a'n nangchingin a chhuhsak a, vengtu awm tawh lohna goal-ah a goal thumna a khungin an chak a nemnghet.

Buaina duhawm

Chelsea manager Enzo Maresca-a'n Premier League lama a chhawr rim Nicolas Jackson chu League Cup-ah a hawhchawlhtir a, hetih lai hian Christopher Nkunku chuan Blues tana inlan a phu tih lantir nan goal thum a lo khung thung.

Kum 26 mi Nkunku hian tun season EPL match li zinga pakhatah chauh inkhel bul a la ṭan, a elpui Jackson erawh rinrawl niin league bikah goal li a khung tawh thung, club tana rinrawl ni tur zawng nih tumin an inel dawn a ni.

Italian manager Maresca chuan, "Nkunku leh Jackson ten tunlaiin an khel ṭha ve ve, goal an khung mai bakah an ṭhiante tan an ṭangkai em em bawk. Team tan an theihna zawng zawng an hlan a, hei hi team tan chanchin ṭha a ni chiang hle.

"Goal khung thei tak player pahnih neih hi a lawmawm a, tu zawkin nge inkhel bul ṭan ang tih ngaihtuah chuan buaina duhawm lam a ni zawk," tiin a sawi a, a ṭul a nih chuan an khingpui tur a zirin an khel rual thei tih a sawi tel bawk.

Blues manager chuan sawi zawmin, "Nicolas, Christo, Joao Felix, Cole Palmer leh Noni Madueke te kan nei, a thlamuan thlak hle. Chutihrualin tuin nge kan goal lam venghim ang tih kan ngaihtuah tel a ngai," tiin team inbuktawk tak din a pawimawh tih a sawi.

Chelsea hian inelna hrang hranga an match hnuhnung pathumah goal kua an khung a, anmahni lamah a lut ve miah lo. Inrinni zan hian Premier League khel turin Brighton an mikhual zui leh dawn, inkhel hmuhnawm an chhawp chhuah leh a rinawm.