Mizoram Athletics Meet-ah record awm belh

Mizoram Athletic Association buatsaih Mizoram Open Athletics Meet vawi 31-na chu nimin khan RG Stadium, Mualpuiah chhunzawm a ni a, 100m-a record siamtu Letjakai Lenthang-a'n 400m-ah pawh record a siam.

Letjakai Lenthang hian 53.32 secs-ah a tlan thleng a, kum 2014-a Malsawmzuala record siam 54.58 secs chu a khum. Tun ṭuma pahnihna thleng Nicholas Vanlalhmangaiha pawhin 53.78 chauh a mamawh a, record awmsa hi a khum ve bawk.

Hmeichhe 400m-ah pawh Vanlaltleipuii'n record thar a siam a, 1:04:81 min-ah tlan thlengin April 2023-a ama record siam 1.07.17 min chu a khum. 10,000m-ah Malsawmtluanga pakhatna a ni a, 36:06:08m-ah a tlan thleng.

Ni khatnaa 100m hmeichhe inelnaa record siamtu Elisian Medai chu long jump-ah pawh 4.59m a thui zuangin, gold medal a la. Triple Jump-ah Vanlalremruatpuia'n 12.50m a thui zuangin pakhatna a ni.