Spurs mikhual tur Qarabag

Tottenham Hotspur manager Ange Postecoglu-a'n a team enkawl tawhte chu a season hnihnaah a hlawhtlinpui ṭhin tih a sawi a, tun hma lama a lo champion ṭhin tawh dan hi Spurts lamah a chhawm nung thei dawn em tih chu fiahna a hmachhawn mek.

Premier League-ah pangana ni mek mah se an tan league nomawi beisei san ngam a harsa - League Cup leh Europa League hi an ban phak theih tur zawk niin a lang, chuvangin inelna an ngai pawimawh hle ang.

Zanin dar 12:15 hian Spurs chuan Europa League khel turin Qarabag an lo mikhual dawn - manager Postecoglu-a'n a player ṭha a chhawr vek lo a nih pawhin team khawng tak erawh a inlan tir tho a ngaiin a rinawm.

Team pahnih te intawn hnuhnung chu 2015/16 Europa League kha niin, an danglamna chu Harry Kane-a goal khat a ni. England captain hi tunah chuan Bayern Munich tan a khel tawh thung, midang kutah mawhphurna a awm ang.

Tun hnaiah Qarabag hi an khel ṭha tluang viau - Azerbaijan club hi an match hnuhnung pathumah an chak vek a, goal kua khungin anmani lamah goal hnih chauh a lut thung, inrintawkna sang tak nan Tottenham Hotspur khelmual an lenglut dawn a ni.