Number 777 Cilic a champion!

Marin Cilic chuan Hangzhou Open khelh zawh takah nomawi a chawi - US Open champion hlui hi tun dinhmunah world number 777 a ni a, mipa tennis inelna ATP Tour title la thei ranking hniam ber record a siam.

Tun hnai season hnih chhung chu Cilic hi khup hliam vangin a buai a, zai tawk foin a inkhel tam thei lo. Tun tournament khel tur pawh hian wildcard pek a ngai hial, a zawna match 22 chhung chak ni hmel hmu lo chungin inelna a hmachhawn ṭan a ni.

Cilic hi beisei phak bakin a khel ṭha thung a, kum 36 a tlin cham vuak vetah Chinese tlangval Zhang Zhizhen chu 7-6 (7-5), 7-6 (7-5) a hnehin a champion a, a tan chuan title hlu leh danglam bik a ni ngei ang.

Croatian tlangval hi a vanglai chuan khawvela a ṭha berte zinga mi a ni phak, kum 2018 kha chuan world number 3 pawh a lo ni hial tawh. Cilic chuan, "Ka tan chuan hun harsa tak a ni a, ranking point leh thil tam tak ka hloh.

"Ka harsatna hneh tura thil ṭha ber chu tennis court-a kir leh a ni a, chumi chu ka ti hlawhtling mai ni loin nomawi hial ka chawi leh ta, ka tan chuan hun chhinchiah tlak bik a ni," tiin a sawi.

World number 43 Zhang lakah Cilic hian vawi 18 ngawt aces a siam a, a service hmasa aṭangin 84% ngawt mai point a hmu thei, a vanglai pel deuh tawh mah se tun hma lama service ṭha tak ang kha chu a la nei reng.