Mbappe-a'n goal a khung leh ta
Kylian Mbappe chuan Real Madrid tan match nga zet a zawnin goal a khung ta a, Deportivo Alaves lakah a team chu 3-2 in hnehna a chanpui - La Liga-ah hmahruaitu Barcelona an um zui ve zel.
Real tan hian Lucas Vazquez, Mbappe leh Rodrygo ten goal khat ṭheuh an khung a, Santiago Bernabeu-ah 3-0 in hma an hruai hman. Mahse, Real-in inenfiahna tur an nei a, si thum faia hma an hruai hnuah goal hnih an chhuah.
Alaves tan Carlos Benavidez leh Kike Garcia ten hun tawp hnaih lamah goal an rawn khung ve a, Santiago Bernabeu-ah lungmuanga chak tura ngaih tawh Real an talbuai tlaikhawhnu hle.
Real Madrid-in hnehna an chan avangin table-ah pahnihna an ni a, hmahruaitu Barcelona chu point khat chiahin an phak lo mek - Catalan club hian match khatin an khel tlem zawk thung a, nizan khan inlanin, he thuziak i chhiar meuh chuan an inthlauhna a danglam leh tawh mai thei.
An nuamsa
Real-in an mualah goal khung turin hun an mamawh rei lo. Inkhel ṭan aṭanga second 57-na lekah an khung nghal - Federico Valverde-a long pass chu Vinicius Junior-a'n a tlanpui hnuah Vazquez tan a siamsak a, Spanish full back hian hnai set sawtah goal-ah a chantir.
Bernabeu-ah Alaves an che hman meuh lo a ni ber a, Real tan Vinicius, Mbappe leh Jude Bellingham te che vel chu mit titlai a tling. Minute 40-na a ni a, Mbappe hun a her chhuak ve leh thung.
Bellingham nen ball an inpek kual hnuah, Mbappe-a'n a hmawr bawkin goal ṭha zet a khung a, minute 22-naa a goal khung pawmsak ni lo mah se, a vawi hnihna erawh pawmsak a ni - Real tan match kua a khelhah goal sarih a khung ta der. Mahse, Mbappe hian a malpuiah hliam a tuar a, kar thum vel tal a chawlh a ngai dawn.
Madrid khaw club hian chawlhlawk hman a nihin 2-0 in hma an hruai tawh a, second half pawh bul an ṭan ṭha - second half ṭan aṭanga minute thumna lekah Rodrygo chuan belhchhah ve lehin, 3-0 a ni der.
Mahse maw...
Real beisei ang vek erawhin a kal lo chiang hle. Hun tawp nan minute nga chiah a awm tawh tihah Carlos Benavidez chuan Alaves tan si phurh a rawn sut ṭhen a, mikhual team an phur thar hluai.
Madrid khaw club an insiamrem hman lo. Goal an chhuah aṭangin minute khat a liam awrh a, Kike Garcia chuan Alaves tan a khung ve leh - minute li a la awm a, tlawm duh lo Alaves-in beiseina thar an nei.
Real goal chhuah danah tlarhnung dem loh theih an ni lo a, 3-0 a hmahruai tawh hnua chak hram hi Carlo Ancelotti-a'n uluk taka a ennawn a ṭul. Champion lai hian Mbappe nei thar mah se, an elpui Barca-in Hansi Flick-a hnuaiah tlawm an la nei lo a, an inthlahdah thiang lo.
Madrid captain Vazquez chuan, "Kan khelh dan kha thlir ila, khatianga kan game a tawp kha chu kan phu lo. Mahse, a êng zawngin thil ka thlir a, tihsual nei mah ila, tihdik tam tak kan nei a ni," a ti a, duhthusama inkhel an khar loh thu a sawi.
An lawm lo
Real lakah point an hlawh chhuak ṭep a, match official-te inkhel enkawl danah Alaves coach Luis Garcia Plaza a lawm lo hle - minute 69-naa Rodrygo thlaktu Endrick chu red card hmu tur a nih thu a sawi.
Kum 18 mi Endrick hi Alaves defender Santiago Mourino lakah a foul a, ball awm loah a khup hmanga a do avangin yellow card pek a ni. Mahse, Alaves coach Luis Garcia Plaza chuan red card tur a nih thu a sawi.
Garcia Plaza chuan, "Red card chiang tak a ni a, tuman a ni lo, tiin an sawi thei lo. Referee khan a hmu lo a nih chuan VAR kan nei a ni lawm ni? Yellow card kha an hmuh tur aia tam an hmu a ni mai thei a, mahse, Endrick erawh red card ngei a ni e," a ti.
Hetihlai hian Ancelotti chuan, "Ka ngaihdan ka sawi thei rih lo. Thil thleng ka hmu lo a, ka la ennawn lo bawk," a ti a, club thuneitu lam chuan Endrick hi a chet dan thleng nawn tawh lo turin an zilh dawn niin khawthlang media-te chuan an tarlang.