Vienna derby entu awm dawn lo

European football-a inkhel 'hot' ber pawl, Vienna derby khelh leh tur match li chhung chu entu an awm a rem dawn lo - hei hi Pathiannia khelh zawh tak derby-a thil thleng vang a ni a, thuneitute chuan entu awm loa derby lo awm leh tur match li kalpui chu a chinfel dan ṭha ber niin an hria a ni.

Pathianni khan Austrian football-a club inhal ber pawl Rapid Vienna leh Austria Vienna an inkhel a, Rapid ho khelmual Allianz Stadion-a inkhelah hian inkhel a zawh rualin buaina a chhuak.

Buaina chhuak avang hian mi 13, police 10 leh fans pathumin hliam an tuar a, inkhelh lai aṭang tawhin buaina hi chu a awm tawh niin Police-te chuan an sawi - inkhelh hmain club pahnih ṭantute chuan khelmualah halmawi an hal nasa tawh a ni.

Thil thleng avang hian Austrian Bundesliga thuneitute leh club pahnih aiawhte chu Thawhṭanni khan an inrawnkhawm nghal a, Vienna derby chu boruak ṭha leh muanawm tak hnuaia khelh zel a nih theih nan, match li lo awm leh tur chu entu awm loa kalpui an titlu ta a ni - Pathianni inkhelah hian 2-1 in Rapid Wien hi an chak.