ATP Finals khel turin Alcaraz a chiang

Mipa tennis thiam zual pariatte inelna ATP Finals 2024 khel turin Carlos Alcaraz chu a tling chiang ta - Spanish star hma hian Jannik Sinner leh Alexander Zverev te pawhin ticket an lo nei fel tawh.

Kum 21 mi Alcaraz hian tun season chhungin French Open leh Wimbledon title a la, inelna lian pahnih bakah hian Indian Wells-ah a champion bawk - a tan kum ṭha a ni a, an ram tan Paris Olympic gold medal erawh a vaw chhuak tel thei rih lo.

Turin khawpuia inelna hmachhawn tur hian, world number 1 Sinner chu August thla khan a lo tling fel tawh. ATP Finals vawi hnih champion tawh Zverev pawh US Open quarterfinal a thlen avang khan a lo tling tawh bawk.

ATP Finals hi November 10-17 chhungin an khel dawn, inlan tur hi tun season chhunga an chet dan ranking aṭanga teh a ni a, a sang zual pariat ten inelna an hmachhawn ang.