Mosquera tan season a tawp

Premier League club Wolves defender Yerson Mosquera chu a khup hliam vangin hun rei tak a chawlh a ngai dawn, a inkhelh theih loh chen tur hi sawi lawk theih ni chiah lo mah se tun season chhungin a inlan hman a rinawm tawh loh a ni.

Kar tawpa Wolves leh Aston Villa inkhelh ṭum khan Mosquera hi a hliam a, khelmual aṭanga zawn chhuah a ngai hial. Colombia international hliam hi endik a nih hnuah zai a ngai dawn tih an sawi.

Mosquera hian tun season Premier League match panga an khelh tawhah bul a la ṭan vek a, season hmasa khan La Liga club Villarreal lamah inchher hriamin Wolves tana rinrawl ni chho tura ngaih a ni hman.

Mahse, hliam vangin a chawlh a ngai leh ta si. Nipui bazar laiin an captain Max Kilman chu West Ham lamah a chhuak bawk a, a hmun ruak luah tur an nei hran lo, coach Gary O'Neil tan luhaina tham a tling ngei ang.

EPL season kal laiah Wolves hian chak ni hmel an la hmu lo, goal 14 chhuah tawhin table mawngphah luahtu an ni a, an chunga awm Everton nen goal chhuah tam ber an ni - tun kar tawp hian Liverpool an hmachhawn ang.