Cesc Fabregas enkawl Como an chak

Como chuan Thawhlehni zan Serie A inkhelah Atalanta chu 3-2 in an hneh. Italian football inelna sang berah hian kum 21 chuang a ral hnuah chak ni hmel an hmu ve leh ta chiah a ni.

Ruahman dan hmasa chuan Thawhṭan zana inkhel tur kha an ni, mahse ruah sur nasa avangin a hun an sawn. Gewiss Stadium-a inkhelah hian mualneitu lamin Davide Zappacosta hmangin goal an nei hmasa.

Mahse, Cesc Fabregas-a enkawl Como hian Gabriel Strefezza chuan sutin a hnuah Atalanta defender Sead Kolasinac chuan anmahni lama a tih luh bakah Alieu Fadera chuan a khung belh a, hun tawp dawna Ademola Lookman-a goal khungin awmzia a nei phak tawh lo.

Serie A bikah Como chak hnuhnung zawk chu kum 2003 May thla daih tawh kha a ni, inelna hniam Serie A lamah an tla thla zui ta bawk. Tun hnaiah insiamṭhain Serie A an kai leh a, tunah chuan chak ni hmel anh hmu ve leh ta a ni.

Como manager Fabregas chuan, "Atalanta hi Champions League khel phak an ni a, team ṭha leh hlauhawm an ni. European team ṭha hmachhawn turin kan inbuatsaih a, kan zir ang ngeiin goal khung theihna remchang pawh kan insiam hnem.

"Team ṭha lakah ṭha tak maia kan khel a nih chuan inringtawkna kan nei tih a chiang a, hei hian rah ṭha leh duhawm zawk pawh a siam ngei ka beisei," tiin a sawi. Como hian Serie A match nga aṭanga point nga hmuin 15-na dinhmun an luah.