ISL: Zaninah Mizo inlan tam dawn

Zan khat an chawlh hnuah Indian Super League chu zanin hian khelh leh a ni dawn a, Mizo player-ten hmun pawimawh an channa Chennaiyin FC chuan Mizo player tamna Mohammedan SC an mikhual ang.

Scottish coach lar Owen Coyle-a enkawl Chennaiyin-ah hian Mizo player Laldinliana Renthlei, PC Laldinpuia leh Lalrinliana Hnamte te an khel a, an match hmasa berah 3-2 a Odisha FC hnehin, Mizo player pathum hian bul an ṭan vek.

Mizo player pathum hi Chennaiyin player thar vek an ni a, Armed Veng South defender Dinliana hian Odisha aṭangin Chennaiyin hi a zawm a, Samthang/Bethlehem Vengthlang tlangval Dinpuia hian Jamshedpur aṭangin Odisha hi a zawm a, Dungtlang/Chanmari tlangval Terina hian Mohun Bagan aṭangin South Indian club hi a zawm thung.

Mohammedan SC hi ISL club zinga Mizo player kawl hnem ber an ni a, Joe Zoherliana (Defender), Vanlalzuidika Chhakchhuak (Defender), Zodingliana Tochhawng (Defender), Rochharzela (Midfielder), Jeremy Laldinpuia (Midfielder), Lalremsanga Fanai (Midfielder) leh Lalrinfela Khiangte (Midfielder) te an nei.

I League champion hian match hnih khel tawhin point khat chiah an la nei a, Zuidika, Adinga leh Remsanga ten match hnih an khelh tawhah bul an la ṭan vek - kum 2014-a ISL khel tawh Adinga hi Mohammedan tan captain a ni.