Setien-a hnuaiah Barcelona chak nghal

Barcelona-in an manganna lak ata hruai chhuak turin Quique Setien an lalut a, Real Betis boss hlui ho hian Granada chu 1-0 in an hneh. 

Catalan club hian an elpui ber Real Madrid an chak tih hre sa chungin an khel a, Zinedine Zidane leh a naute an thlah fal duh lo. Barcelona tan Lionel Messi chu coach thar hnuaiah pawh chhandamtu a la ni a, Argentine forward hian minute 76-naah he inkhela goal awmchhun hi a khung. 

Pathianni zan inkhel dangah rin loh takin Mallorca chuan 4-1 in Valencia an sawp a, Champions League khelh tum Valencia tan result ṭha a ni lo. 

Barcelona-in an ban tak Ernesto Valverde-a hnuaiah an 'game' tak tak an khel chhuak lo tia sawi a ni ṭhin a, top club la enkawl ngai lo Setien an rin chhan pawh 'Barcelona system' a kalpui ṭhin vang a ni. 

Catalan club beisei ang ngeiin Setien-a hnuaiah ball an chang tam a, Nou Camp-a inkhelah hian 80% zet chu Barca hian ball an chang - lawm erawh a kim lo. Barca hian passing game ṭha tak khel mah se an che vel a muang a, Granada tlarhnung lai aṭanga nawr 'kuak' chu an tum ni mahse minute 69-naa Granada centre back German Sanchez hnawhchhuah a nih hma chuan an 'nil'.

Minute 76-naah Barca an vannei ta nge nge a, Messi, Antoine Griezmann leh Arturo Vidal ten mawi zeta ball an inpek kual hnuah Messi-a'n a hmawr bawkin goal a khung - he goal lut tura 'movement' erawh Barca dik tak 'ke' chhuak a ni. 

Barca-in Setien-a hnuaiah an match khatna an khel chauh a, ngaihdan siam nan a la hma. Mahse, an khelh dan phung an thlak ngei tih a lang a, Barca passing game mawi tak khel turin player-te tha a ṭhum ve ta deuh tih erawh a lang. 

Football-in system thar a chuangkai zel a, Jurgen Klopp-a'n gegenpressing larpuia Pep Guardiola ten 'tiki taka' hmanga football an cheimawi hnuah game muang tan hlawhtlin a harsa a, a tawi zawnga sawi chuan Granada laka Barca hian Liverpool emaw City hmachhawn se an chak lohna lai hmuh tur a tam ang. 

Thil chiang tak erawh Setien hian a game hmasa ber aṭangin zir belh tam tak a nei ang a, an chak lohna lai pawh thawm ṭhat ngei a tum ang. Barca system bel sa a nih bawk avangin Setien-a game kalpui zel dan tur hriat a châkawm hle.

Valencia-in 4-1 in Mallorca an ngam lo a, tlak hlau Mallorca tan Ante Budimir (2), Antonio Raillo leh Dani Rodriguez ten goal an khung. Valencia tan Daniel Parejo hnawhchhuah a nih avangin minute 82-naa Ferran Torres goal khungin phurna a pe zo tawh lo.