Aizawl FC an chak; A sang pali zingah SYS

LZ Juice MPL11-ah Aizawl FC-in nimin khan Sihphir Venghlun FC 2-0 in an hneh a, league winner ni turin an dinhmun a ṭha. Vawiin chhun dar 12:00 hian Chanmari FC leh Mizoram Police FC te an inkhel dawn a, Police hian hnehna an chang a nih chuan I League club hi league winner an ni dawn. Chanmari hian hnehna chang ta pawh ni se, Aizawl FC hian an match hnuhnung bera Chawnpui an hneh chuan an league winner an ni tho ang.

Nimin inkhel hnuhnung zawkah SYS FC-in an elpui Chawnpui FC 1-0 in an hneh a, a sang pali zingah an inhlangkai. Lunglei club hian match hnuhnung berah anmahni ang bawka point 16 hmu an hmachhawn dawn a, semifinal kawng a la inhawng zel.

AFC an chak

Sihphir Venghlunin Aizawl FC lakah point hlawhchhuah ngei tumin tlarhnung rem phui an tum thu an sawi. Robert Laldinthara hote hian I League club tana goal khung tam pathum Lalbiakdika (11 goals) bakah C. Lalhriatpuia (7 goals) leh Augustine Lalrochana (7 goals) te chelh thei mah se tlarhnung erawh an rem phui zo lo.

Aizawl FC tan MPL9-a Chawnpui champion puitu Laltlanzova'n minute 13-na lekah kawh zetin a pet goal a, Champhai Kanan tlangval Zozoa 'finishing' a ṭha takzet. I League club-in inkhel thununin goal chance pawh ngah mah se, an vannei tel.

Minute 38-naah H. Lalrempuia'n freekick aṭangin a pet goal a, replay aṭanga a lan danin goalkeeper-in goalline a pelh hmain beng chhuak hman angin lang mah se assistant referee-in goal-ah a ngai thung. Sihphir Venghlunin Lalthanpuia (Tepuia) leh Lalbiakzuala te hmangin chance ṭha bik an hlah a, vanneih ṭum ni se point hlawh chhuak thei an ni. Coach Robert-a chuan, "Referee thutluknaah ka lawm lo takzet," tiin Vanglaini a hrilh.

Police tan hun ṭha

MPL champion Mizoram Police-in semifinal ticket an la nei lo a, vawiin chhun dar 12:00-a Chanmari FC nena an inkhel tur hi a pawimawh dawn. Chanmari hian Kolkata-ah I League 3 an khelh mek avangin B Team an inlan a ngai dawn a, Police tan point thum hmuhna remchang a ni ang.

Chutihrualin Chanmari B Team hian MPL9 champion Chawnpui FC an chelh thei a, Police tan pawh awlsam taka chak ngawt theih a ni lo ang. Chanmari hi MPL league winner an la nih theih avangin Police ang thoa chak mamawh ve tho an ni.

SYS tan Mesak

SYS-in Mesak C. Lalringngheta penalty hmangin Chawnpui 1-0 in an hneh a, penalty hi Nicholas Ngurthansanga hlawh chhuak a ni. Lunglei club hian minute 23-naah goal an khung a, hun tawp thlengin goal an venghim zui.

Chak mamawh Chawnpuiin si phurh sut tumin an nawr na a, goal khung theihna chance pawh an nei. Tea Chinzah-in crossbar a pet per a, goal an khung theih miau loh avangin paruknaah an tla thla. SYS erawh head to head-ah Sihphir Venghlun aia an ṭhat zawk avangin palinaah an awm thung.

Kawng chi hnih

Ramhlun Athletic-in semifinal an la khel thei a, chutihrualin pasarihnaah an awm miau avangin relegation playoff khel thei dinhmunah an ding. Vawiin tlai dar 3:00 hian Danny Lalduhawma hoten FC Bethlehem an hmachhawn ang a, chak ngei an tum ang.

Ramhlun hian Bethlehem hi an hmachhawn hmasak ṭumin 3-2 in an hneh tawh a, tun ṭumah erawh FCB hi an relegate tawh avangin an hna a awlsam sawt tura ngaih a ni.