Man United an chefuh thei lo

Manchester United chuan Europa League-ah bul an ṭan fuh lo. Erik ten Hag-a hoten Old Trafford-ah FC Twente an mikhual a, 1-1 in an inhnehtawk. Christian Eriksen-a'n first half-ah goal ṭha zet khung mah se second half-ah Danish midfielder hian ball a hloh avangin Sam Lammers-a'n siphurh a sut a, English club-in point khat chauh an hlawh chhuak.

Nilaini zan inkhelah Marcus Rashford-a'n bul a ṭan a, Ten Hag-a player ṭhenkhat awltir mah se an ṭhat danin a luhtirah a ngaih theih. Mahni muala khel United-in minute 35-naah goal an khung a, Eriksen-a'n box chhungah rilru fim puin a zawna ball per chu chiang zetin a pet lut.

Man United hian goal an khung bakah ball chang tam zawk mah se goal hmaah FC Twente an hlauhawm a, Dutch club hian second half-ah siphurh an sut. Minute 68-naah Sam Lammers chuan Eriksen-a ball chan lai laksakin box chhungah a khalh a, kawh zeta a pet avangin Andre Onana tan dah ngaihna awm lo.

Mualneitu lam hian hun tawp lamah nawr viau mah se goal an sual chhuak thei lo a, point khatah an lungawi a ṭul. Man United hian European competition-a an match hnuhnung parukah vawi khat chiah a chak a, an record a chhe hle.

Tun season-ah pawh Ten Hag-a hoten bul an ṭan ṭha lo a, Community Shield-ah Man City lakah khel ṭha mah se an chak lo. Premier League-ah an che chhe chhunzawm a, Fulham hnehin bul ṭan mah se Brighton leh Liverpool an hneh lo. International break zawhah Southampton (3-0) leh Barnsley (7-0) an sawp a, an phur vanglai takin Crystal Palace nen goal awm loin an inhnehtawk. Premier League-ah 11-naah an awm mek.

Europa League-ah FC Porto a hmachhawn leh dawn a, Portuguese club hi FC Twente aia khauh tur zawk an ni. Season liam ta khan Ten Hag-a hote hian Champions League an khel a, vawi khat chauh an chak avangin table mawngphahah an awm a, Europa League pawh an khel zui thei lo.

Kuminah FA Cup champion zarah Man United-in Europa League an khel a, an bul ṭan dan thlir chuan champion rinkaia dah an harsa. Chutihrualin Champions League ang thoin Europa League pawh kalphung thar a nih avangin insiamremna hun ṭha a awm a, match sarih khelh hma bakah point kua an hmuh theih chuan knockout stage lut thei tura ngaih an ni.

Inkhelh banah Ten Hag chuan, "Keimah ngei pawh inenfiah ka ngai a ni," tiin a sawi a, a club hlui Twente player-ten chak châkna an ngah zawk thu a sawi tel bawk. Dutch manager hian season tluanin Man United hi a enkawl thei ang em tih hi ngaihtuah tham a ni ta.

April 2022 khan Ten Hag hi Man United manager a nih tur thu an puang a, Ralf Rangnick a thlak. Season khatnaah United hi Premier League-ah pathumna a nihpui a, League Cup nomawi chawipuiin kum ruk chhung champion tawh lo tan chanchin lawmawm a tling.

Season hnihnaah Man United hi league-ah pariatnaah an awm thung a, Premier League history-a an dinhmun hniam ber ṭum a ni. Mahse, FA Cup final-ah an hmelma Manchester City an hneh avangin Ten Hag-a'n a hna a chhunzawm a, club thuneituten Dutch manager chungah rinna an nghah thu an sawi nachungin club ṭantute erawh a tilawm zo rih lo.