Arsenal timawitu Nwaneri

Rawlthar Ethan Nwaneri chuan Arsenal senior team tana khel tlak a nihzia chu a takin a lantir - Nilaini zan League Cup inkhelah goal hnih khungin Gunners chu Bolton Wanderers lakah 5-1 in a chakpui.

Kum 17 mi Nwaneri hian a vawi khat nan Arsenal tan inkhel bul a ṭan a, tawnhriat nei tam karah inlanin, forward Raheem Sterling leh midfielder Declan Rice te siamsak a khung.

Sterling leh Rice te bakah Kai Havertz te chuan goal khat ṭheuh an khung bawk - mikhual Bolton tan Aaron Collins chuan goal khat khung ve mah se Emirates Stadium chhunga inkhel entute thin phu a ti rang phak lo.

League One club Bolton hnehtu Arsenal hian League Cup last 16-ah chuan Preston an hmachhawn leh ang. Khualmuala feh chhuak tur ni mah se Championship club lakah but rit zawk an ni leh ang.

Nwaneri chungchang sawiin Mikel Arteta chuan, "Inrintawkna sang tak nen a inkhel a, khelmual chhungah eng nge a tih tur leh a ṭhainte tana a ṭangkai theih dan tur a man chak takzet tih chu kan hmu nghal.

"A nihna takah chuan senior team tana a match bul ṭanna hmasa berah hian ka beisei phak baka ṭhain a khel, kei chauh ni loin midang beisei pawh a khum. Kan zinga tel a phu a, hmun pawh a chang zel ang," tiin an academy chhuak a ringtawk hle.

David Raya hahchawlh zanah goalkeeper Jack Porter a inlan thung a, kum 16 leh ni 72 mi chauh ni chunga inkhel Porter hi Arsenal tana inkhel bul ṭan thei naupang a ni nghal bawk. Cesc Fabregas-a record dinglai a rawn khum ta chiah.

A nihna takah chuan Porter hi 'fourth choice' a ni. Raya chuan hliam tenau a nei a, Neto chuan a club hmasa Bournemouth tan League Cup a khelh tawh vangin a inlan thei lo - anni bakah hian Tommy Setford a inhlia, heng karah hian Porter tan remchang a awm phah a ni.

Gunners manager Arteta chuan, "Inkhelh hma ni kha a chungah mawhphurhna sang ta a awm tih ka hrilh a, chumi hlen chhuak tur chuan a ṭha tawk tih ka hrilh bawk. A tan chuan tawnhriat ṭha tak a ni a, a chanvo a hlen ṭha hle bakw," tiin a sawi.

Arsene Wenger hunlai aṭang tawhin League Cup hi Arsenal chuan player naupang enchhin nan an hmang ṭhin, an enchhin fuh zingah Fabregas leh Jack Wilshere te pawh an tel.

Tun ṭumah pawh hian - Porter, Josh Nichols, Myles Lewis-Skelly leh Nwaneri te chuan senior team tana inkhel bul an ṭanna hmasa ber a ni a, rawlthar Maldini Kacurri leh Ismeal Kabia te pawh an inlan vawi khatna a ni bawk.

Player naupang rual a chhawr lai hian tawnhriat nei ṭha Rice leh Jorginho te chu inkhel khaikhawm turin a dah tho a, tlarhma lamah Sterling leh Saka an awm bawk, inrintawkna neih nan leh boruak ṭha siam nan chak a pawimawh a ni.

Mikel Arteta naute duh ber erawh Premier League nomawi a ni, kum 21 hnua a vawi khat nan champion leh an tum mek - Manchester City nen an inhnehtawk hlim chauh a ni a, tun kar tawp hian Leicester City an mikhual leh nghal ang.