Serena-i coach hlui leh Osaka thawkdun

Naomi Osaka chuan a tennis zinkawngah hmasawnna leh danglamna thlen ngei a tum a, coach thawnhriat nei ṭha Patrick Mouratoglou nen an thawk dun tih a puang.

Japanese nula Osaka hian China Open a khel mek, a match hmasa berah Lucia Bronzetti chu 6-3, 6-2 in a hneh, he inkhelah hian a sir aṭangin a coach thar Mouratoglou chuan a lo ṭawiawm.

Osaka hi a coach hmasa Wim Fisette nen September thla tir khan an inṭhen a, tunah chuan Serne Williams-i coach hlui Mouratoglou nen an thawkdun ta zawk, boruak danglam neih theih ngei pawh a beisei ngam ang.

Kum 26 mi Osaka chuan, "A nihna takah chuan a hma khan Mouratoglou hi ka hrechiang ngai vak lo, zep loa sawi chuan Serena nen an lo thawkdun tih pawh ka hre lem lo.

"Mahse, tennis court-ah hun kan hmang dun a, a tawnhriat leh min kaihhruai dan ka hriat aṭangin coach ṭha tak a ni tih ka chiang nghal mai, hetianga ka sawi chhan chu zep nei lem loa thu sawi ka duh vang a ni," a ti.

Osaka hian Grand Slam nomawi pawh pali a chawi tawh, a vanglai chuan world number 1 pawh a ni hial. Mahse, fa a neih avangin a chawl lailawk reng a, tun hnaiah lo kir leh mah se ngai a la awh leh thei rih chiah lo.

Beijing khawpuia inelna neihah hian, a match pahnihna atan seeded 21-na Yulia Putintseva nen an inkhel leh dawn a ni.