Vawiinah Chanmari FC inlan dawn

I League 3 final round-a an match hnihna chu Chanmari FC-in vawiin tlai dar 3:00 hian an khel dawn a, Dalbir Football Academy nen an intawng dawn - Dalbir FA hi football thiam state Punjab champion an ni a, an tawh a khirh dawn.

Hetihrual hian Lalsangzuala Hmar enkawl Chanmari FC hi an inrintawk vanglai tak a ni - I League 3-ah an la tlawm miah lo! Mizo club hian group stage match liah hnehna an chang vek a, goal 12 zet khungin, an lamah goal hnih chiah a lut.

Chanmari chet ṭhat chhan hi mahni muala khelh vang, tia kan sawi a nih pawhin Kolkata khawpuia an match hmasa berah pawh harsatna nei loin an chak nghal. Mizo club hian Mumbai champion MYJ-GMSC chu 2-0 in an hneh a, match nga an khelh tawhah an la chak vek tihna a ni.

CFC hi group B-ah team dang pali nen an awm a, an inkhelh kual vek hnuah a sang pahnih chu I League 2 khel turin an tling dawn. Mizo club hian an match hmasa berah hnehna an chan nghal avangin an chance a ṭha nghal viau a, Dalbir hi an hneh a nih chuan kawng a inhawng zau lehzual sawt ang.

Chutihrual chuan Dalbir hi zuam sual theih an ni. Punjab club hi Punjabi University behchhana din niin, player pawh an naupang tlang a, an phur tlang hle - an match hmasa berah team ṭha Abbas Union chu 1-1 in an chelh thei.

Group Stage-ah pawh team ṭha Sesa Football Academy, Garhwal Heroes, Kerala United leh Maharashtra Oranje te nen awm hoin, group stage an paltlang thei a, Chanmari lakah chak tumin an khel ngam ang.