Champion lai Liverpool an chak nuamsa

League Cup champion Liverpool-in tun season Carabao Cup-a an match hmasa berah goal nga an khung nghal - Nilaini zan khan an mikhual West Ham chu 5-1 ngawtin an sawp a, fourth round an lut.

Reds tan Diogo Jota leh Cody Gakpo ten goal hnih ve ve an khung a, Mohamed Salah chuan goal khat a khung bawk. Hammers lam hian goal khat nei ve mah se, an goal neih pawh hi an khung a ni lo - Reds centre back Jarell Quansah-a'n an lama a tihluh a ni.

West Ham midfielder Edson Alvarez chu yellow card pahnih a hmuh avangin hnawhchhuah a ni a, chhuanlama hman erawh a thiang lo. London club hian player 10-a an khelh hma hian goal thum an chhuah fel der tawh.

Liverpool Arne Slot-a'n champion nomawi humhim tura theihtawp an chhuah tur thu a sawi a, an match hmasa berah anmahni ang thoa Premier League club 5-1 in an sawp - Reds tum hi thil châkawm a ni dawn lo.

Reds an nghing!

5-1 ngawta chak zanah 'Liverpool an nghing' tih chu thil awihawm lo niin lang mah se a dik tlat - minute 18-naah Reds striker hlui Danny Ings chuan goal hmahruai a khungah a inngai a, mahse, offside vangin pawm a ni lo.

Hammers manager Julen Lopetegui a lungawi lo a, official ho chu Video Assistant Referee (VAR) rawn turin a ti. Spanish manager hian hriat loh erawh a nei a, League Cup-ah hian semifinal aṭang chauhin VAR hman a ni dawn.

Hei pawh semifinal-a lut club-a zir a ni a, club tenauin semifinal an luh chuan an stadium-ah VAR dah turin senso a hautak dawn - hei vang hian semifinal-ah pawh club lut a zirin hman a ni kher lo ang.

VAR rawn tur awm lo tuarah inngai mah se, Hammers hian Anfield-ah goal erawh an khung hmasa tho. Liverpool midfielder Wataru Endo chuan ball petchhuah a tumna lamah a khelhpui Jarell Quansah a pet per a, an goal lamah a lut daih - minute 21-na a ni.

Comeback ropui

Mahse, Bournemouth laka 3-0 a chak hlim Liverpool-in Hammers lakah tlawm an tum lo. Goal an chhuah aṭanga minute li hnu lawkah Jota chuan si phurh sutna goal a khung a, a vawi khat nana Liverpool tana bul ṭan Federico Chiesa siamsak a ni.

Goal dang lut loin chawlhlawk hman a ni a, second half-ah Liverpool an hlauhawm lehzual. Second half ṭan aṭanga minute linaah Jota kan hmu lehnghal a, Portugal forward hian Curtis Jones-a ball pek ṭha zet chu goal-ah a chantir.

Liverpool-in rei lotêah hma an hruai zui a, an vanneihna erawh hmuh hmaih a harsa. Jota goal khung hma hian defender Joe Gomez chu box chhungah a handball ngei niin a lang a, mahse, referee berin a hmuh miau loh avangin penalty pek an ni lo.

2-1 a nih lai hian Hammers tan Max Kilman chuan si phurh sutna remchang nei mah se a chhawr lo a, Liverpool-in an hrem zui. Bench aṭanga luhtir Salah chuan an goal thumna a khung a, Alvarez hnawhchhuah zui niin, Reds hian Gakpo hmangin goal hnih an khung belh a, Anfield-ah chiang takin an chak.

Vanduaina

West Ham-in Anfield-ah chak loh chhuanlam an nei. Ings-a goal khung pawmsak an nih loh bakah Gomez-a penalty chawi tur pek an ni lo a, coach Lopetegui-a'n khelmual sirah a lawm lohna a lantir nasa deuh a, a inhliam!

Real Madrid boss hlui hian a lawm lohna lamah khelmual a ṭum a, a che na deuh a ni ang - a chawnah hliam tenau a nei! Hei mai a ni lo, official a hnial avangin yellow card pek a ni bawk a, Lopetegui tan zan ṭha a ni mawlh lo.

Hammers hian 2-1 a nih laiin 2-2 nihtir theihna remchang an nei a, mahse, English centre back Max Kilman chuan hnai set sawtah a chance neih hi goal-ah a chantir thei lo - lut ngat se, thawnthu a danglam mai thei.

Liverpool tlarhnungin nghin chang a la nei tih a lang a, hei hi Arne Slot-a tan siamrem vat a ṭul. A pumpuia thlir erawhin Reds-in chak an phu a, vawi 21 ngawt shot an neih zinga 11 lai chu target-ah a kal miau avangin goal nga an khung pawh a awm hle.