Mizoram Open Athletics Meet 2024 a ṭiak ta: MSSC Non Residential Coaching an champion

Mizoram Athletic Association buatsaih Mizoram Open Athletics Meet vawi 31-na chu nimin khan RG Stadium-ah khar a ni a, MSSC Non Residential Coaching (NRC) chu pakhatna niin Hrangbana College chu pahnihna an ni.

Letjakai leh Elisian

Inelna hi ni thum awh a ni a, ni tinin record thar a awm. Niminah 200m inelna neih a ni a, Letjakai Lenthang chuan 23:10 secs-ah tlan thlengin record thar a siam. Letjakai hian kum 2012-a Lalsangbera record siam a khum a, Dawrpui tlangval hian 23.50 secs-ah a tlan thleng.

Republic Veng tlangval Letjakai hi mipa best athletes-ah thlan a ni a, tun ṭum inelnaah hian 100m, 200m leh 400m-ah gold a la a, record thar a siam ve bawk. Hmeichhe lamah Lunglei nula Elisian Medai chu best athletes-ah thlan a ni thung. Elisian-i hian 100m-ah record thar a siam bakah long jump-ah gold a la a; high jump leh 200m-ah silver medal a la bawk.

Record dang

Mipa inelnaah Letjakai Lenthang-a'n mimalin record pathum a siam a, MSSC Non Residential Coaching chu 4X100M-ah gold a lakpui bawk. NRC hian 45.51 secs-ah an tlan thleng a, kum 2015-a LNH Memorial record siam 48.70 secs chu an khum.

Hmeichhe lamah Elisian-i'n 100m-a record a siam a, 400m-ah Vanlaltleipuii'n record a siam bawk. Tleipuii hian 1:04:81 mins-ah a tlan thleng a, April 2023-a ama record siam tawh 1.07.17 min chu a khum.

1500m-ah gold medal la pahnih an awm a; Ramdinmawii Chhangte leh H. Ngohlaso te 5.35.77 mins-ah an tlan thleng a, record thar a ni. Anni pahnih hian kum 2015-a Lalnuntluangi record siam 5.39.15 min chu an khum ve bawk.

Awmze nei training

India ram chu sawi loh NorthEast-a lang khawpin Mizo athlete-te la ṭha tawk lo mah se hmasawnna hmuh tur a awm a, MSSC-in tlai tina MSSC Non Residential Coaching an lakpui rah a tihtheih.

MSSC NRC hi kum 2023 May aṭangin training hi neih ṭan a ni a, kum tluanin training hi a awm. Tunah hian batch lina an kal mek. NRC hi Mizoram Open Athletics Meet 2024-ah chiang takin an champion.

MSSC coach Vanlalawmpuia Fanai (Ctea) chuan, "Mizoram State Sports Council (MSSC) hmalaknaa kum tluana training kan nei thei hi kan hlawkpui hle. Chutihrualin state dang elpha tur chuan sorkar leh Mizoram Athletic Association anga ṭan lehzual a ṭul ang," tiin Vanglaini a hrilh.

Tehna dik lo?

1500m hmeichhe inelnaah H. Ngohlaso chu 22:03:86 mins-ah a tlan thleng a, gold medal a la. He inelnaa record awm sa chu Lalhmingsangi siam a ni a, December 2018 khan Champhaia running track-ah 5000m hi 21.11.07 min-ah a tlan thleng.

Mizoram Athletic Association-in Champhaia running track sei zawng hi a teh tawh a, a tling lo tih a hre chhuak. Hei vang hian Lalhmingsangi record siam hi pawm a ni ta lo a, H. Ngohlaso-i'n record thar a siamah ngaih a ni hman. Mahse, record hlui hai let a ni a, kum 2005 khan Zodinsangi'n Ramhlun Sports Complex-ah 1500m hi 22.00.08 min-ah a tlan thleng a, hei hi record-ah pawm a ni ta zawk.