Reds leh City kawng a awlsam dawn lo

Carabao Cup third round-ah match khat chiah khelh tur a awm tawh a, Nilaini zan khan fourth round-a inhmachhawn tur a chiang nghal - champion lai Liverpool leh Manchester City kawng a awlsam dawn lo.

Arne Slot-a enkawl Liverpool hian Premier League team fei Brighton & Hove Albion chu khualmualah an lenchilh a ṭul dawn a, Slot-a'n champion nomawi humhim a tumna kawngah Premier League club a hmachhawn chhunzawm dawn.

Premier League champion Manchester City boss Pep Guardiola-a'n League Cup chu vei bera a neih loh tur thu a sawi tawh a, ngaih pawimawh a tum lo. Mahse, fourth round-ah team ṭha Tottenham Hotspur an hmachhawn dawn a, a insum reng thei ang em? Hunin a hril ang.

Manchester United-in Leicester City an mikhual dawn a, Arsenal-in Championship club Preston North End an lenchilh ang a, Chelsea-in AFC Wimbledon leh Newcastle United inkhela chak zawk an hmachhawn dawn thung.

League Two club AFC Wimbledon leh Magpies hi tun kara inkhel tura tih ni mah se, ruah sur nasat avangin Wimbledon khelmualah an inkhel thei lo a, October 1, Thawhlehni zanah team pahnih hi an inhmachhawn ang.