Hmahruaitu Barcelona an chak leh ta

Barcelona-in La Liga-ah chak loh an thiam tawh lo - Nilaini zan khan match sarih an khelh tawha an vawi sarih chakna ni turin hnehna an chang leh ta a, an mikhual Getafe chu 1-0 in an hneh.

Catalan club tan Robert Lewandowski chuan inkhela goal awmchhun a khung a, Polish striker goal khung hmangin Barca an chak. La Liga table chung ber an luah chhunzawm zel a, point liin anmahni hnaih bertu Real Madrid an tlansan leh ta.

Barca boss Hansi Flick chuan, "Minute 90 chuang rim takin kan bei thei a, ka player-te ka chhuang hle. Football kan thiam a ni mai lo a, rilru paukhauh kan nei tel a ni," a ti a, a naute khelh dan a chhuang hle.

A hming Lewy

Barcelona tan Lewandowski chuan minute 19-naah goal hmahruai a khung a, league match sariha goal sarih a khungna chiah a ni - he goal luh theih nan hian Getafe goalkeeper David Soria a chesual a, Jules Kounde-a cross chu dang perin, Lewandowski-a ke bulah tak a tla.

Lewy hian hnai set sawt aṭangin goal-ah a lo chantir nghal a, Bayern Munich-a a boss hlui Flick-a hnuaiah a vul thar leh mek. Kum 36 mi striker hian goal sarih a khung bakah assist vawi hnih a nei tawh bawk.

Barca boss Flick chuan, "Ka tan chuan Lewandowski hi tun hnai kum 10 chhunga number 9 ṭha ber a ni. A hna chu goal hmaa a tih tur tih a ni a, a tlin hle," a ti a, Polish striker a fak thiam hle.

Inkhel hmuhnawm

Getafe hian si phurh sutna remchang an nei a, mahse, an chhawr lo. Alex Sola-a cross chu Carles Perez chuan uiawm zetin Barca goalkeeper Inaki Pena zawnah tak a tauh a, an chance neih ṭhat bik chu engmah lo maiah a chantir.

Barca hian goal khat chiah khung mah se, khung belh theihna remchang an nei bawk. Lamine Yamal-a shot ṭha zet chu Getafe keeper Soria chuan a thiam thil 'show' nan a hmang a, a lo dang ṭha hle.

Raphinha a hmuhnawm tluan chhuak zak a, a chance neih vawi thum vel chu uiawm takin a hlah. Hetihlai hian Getafe pawhin hun tawp dawnah hmahruai nawn theihna an nei a, mahse, Getafe substitute Borja Mayoral chuan an hun ṭha neih a khawhral.

Szczesny maw?

Barcelona hian an first choice keeper Marc-Andre ter Stegen chu season khat chhung hliam vangin an chhawr thei dawn lo a, Nilaini zanah pawh Pena-a'n si ban a nghak - hetiang boruak karah hian Polish keeper chawl tawh Wojciech Szczesny an la lut dawn nia sawi a ni.

Mahse, Flick chuan, "Ka player-te chungchang bak ka sawi ngai lo. Inaki hi kan number one goalkeeper a ni a, ani ang keeper kan nei hi kan lawm hle. Chu chu ka sawi theih chih a ni," a ti zet a, a sawi zawm leh tho!

Flick chuan, "Inaki hi kum 25 mi a ni a, keeper dang erawh an naupang hle. Chuvang chuan tawnhriat nei keeper kan mamawh a, kan sawi mek a, thutlukna kan la siam ang," a ti a, kum 34 mi Szczęsny hi season khat chhung atan an la dawn niin an sawi - he thuziak i chhiar meuh chuan a chiang tawh hial mai thei.