ISL-ah Mizo tu nge champion tawh?

India rama club football inelna sang ber Indian Super League an khel leh ta mup mup a, Mizoram aṭang pawhin player 37 ngawtin inelna an hmachhawn - season hmasa aiin Mizoram player hi 10 ngawtin kan tam zawk.

Tun season hmaa Mizoram player an tam ber kum, kum 2020 khan 30 an awm a, hei pawh player sarih laiin khum a ni - a lawmawm zual lai chu Mizoram player-te hi a tikimtu ni loin, player ṭangkai an ni deuh zel a, zan tin Mizo player inkhel en tur a awm. Indian football ngainatu tan en a manhla bik ṭhin.

ISL hi season 11 khelh a nihna niin, nomawi hi ATK, Chennaiyin, Bengaluru, Mumbai City, Hyderabad leh Mohun Bagan ten an lo chawi tawh. ATK hi vawi thum champion in, Chennaiyin leh Mumbai City te vawi hnih ve ve an champion tawh bawk.

Kum 2014-a ATK an champion khan Mizo player an tel lo a, kum 2015-a Chennaiyin an champion khan Jeje Lalpekhlua leh Lalhmangaihsanga Ralte (Sena Ralte) te chu South Indian club tan hian khelin, ISL-a Mizo player champion hmasa ber an ni.

ATK-in kum 2016 khan a vawi hnih nan ISL nomawi an chawi a, Robert Lalthlamuana a tel. 2017-18 season-ah Chennaiyin chu a vawi hnih nan an champion a, Jeje bakah Jerry Lalrinzuala te chu squad-ah an tel a, player pawimawh an ni.

Kum 2018-19 season khan Bengaluru an champion a, Edmund Lalrindika chu squad-ah hian a tel. ATK-in a vawi thum nan 2019-20 season khan ISL nomawi an chawi a, Ricky Lallawmawma chu squad-ah a tel.

Mumbai City-in a vawi khat nan 2020-21 season khan ISL nomawi an chawi a, Hmingthanmawia Ralte (Valpuia) a tel. Hyderabad-in 2021-22 season khan Indian football barakhaihin, ISL nomawi an chawi a, Lalbiakhlua Jongte, Mark Zothanpuia leh Lalawmpuia Ralte te chu squad-ah an awm a, hmun pawimawh erawh an chang phak lo.

Mohun Bagan-in 2022-23 season khan ISL nomawi chawiin K. Lalṭhathanga leh Lalrinliana Hnamte an kawl a, season hmasa champion Mumbai City-in Lallianzuala Chhangte, Lalengmawia Ralte leh Hmingthanmawia Ralte te an kawl bawk.

ISL-ah Mizo player 13-in champion nomawi an chawi tawh tihna a ni a, chutihrual chuan champion squad-a tel siin, season tluana inlan lote pawh an awm ve tho tih erawh hriat a ṭha - season tinin, kum 2014 tih lohah chuan champion team-ah Mizo player an awm ziah tihna a ni.

Jeje-a'n vawi hnih nomawi chawiin, Valpuia chu vawi hnih champion thei dang a ni bawk. Jeje hi ISL an champion ṭum hnihah player pawimawh a ni phak ve ve a, 2017-18 season-a Stiven Mendoza nena an inkawp chu tun thlenga Indian football titi a la tling.

ISL 2024-25 khelh mek a ni a, Mizoram player awm lohna awm chhun Punjab FC an champion a nih ngawt loh chuan Mizo player zingah ISL nomawi chawi an awm leh ngei dawn tihna a ni.