Trossard hnawh chhuah kha a dik

Referee Michael Oliver-a'n Arsenal forward Leandro Trossard a hnawhchhuah chungchang kha ennawn a ni a, a ennawntu 'Key Match Incidents Panel' chuan thutlukna dik niin an sawi.

Arsenal leh Manchester City inkhelh ṭumin Trossard hian an khingpuiin freekick an pet tur a lo tikhawtlai zeuh a, a vawi hnih nan yellow card pek niin khelmual a chhuahsan.

Premier League kar tawpa inkhelte hi ennawntu pawl an awm a, chung mite chuan, "Trossard khan chiang takin freekick pet tur kha a tikhawtlai a ni," tiin an sawi, hetianga player an chet chuan yellow card hmanga hrem theih an ni.

Tun season chhungin Gunners hian hetiang hi vawi hnih an tawng tawh - Brighton & Hove Albion nen an inkhelh ṭumin Declan Rice chu hrem a lo ni tawh bawk - English midfielder phei hi chu an khingpui lamin an hnung aṭangin ball an dah per zawk niin a lang.

Eihad Stadium-a inkhelah khan Manchester City player Jeremy Doku pawhin an khingpui lam ball pet tur a tikhawtlai ngei mai a, ani erawh hremna pek a ni lo thung - thil tih inanga hremna hmu lo bik an awm hi titi titamtu a ni.