Giroud hoin Los Angeles an champion

Arsenal leh Chelsea striker hlui Olivier Giroud khelhna Los Angeles FC chuan nimin zing khan Sporting Kansas chu 3-1 in an hneh a, an phu ang ngeiin US Open Cup an la.

Kum 37 mi Giroud hian minute 53-naah hnai tak aṭangin goal hmahruai a khung a, mahse Kansas City lamin Erik Thommy hmangin an sut a, hun pangngaiah goal dang luh belh loin extra time an khelh a ngaih phah.

A rei hnuah team ṭha zawk an nihna a lang - Los Angeles FC tan Mexican defender Omar Campos leh Sierra Leonenan forward Kei Kamara te chuan an khung belh a, an khingpui lamin a chhanletna an nei tawh lo.

AC Milan aṭanga Major League Soccer (MLS) club zawmtu Giroud chuan, "He hmunah hian nomawi chawi duhin ka kal a, hetiang final boruak nuam leh ropui tawn hi a nuam ka ti hle.

"Team hian hun nuam ka tawng reng bik lo, tun hnaiah kan tihsual ṭhenkhat avangin hrehawm pawh kan ti ve hle. Mahse, inlungrual takin kan thawkho tlat a, a tawpah chuan min ṭantu leh keimahni tan kan hlawhtling," tiin a sawi.

Los Angeles hian league nomawi an la beisei thei bawk. LA Galaxy, Chicago Fire leh DC United te chuan tun hmain League leh Cup an lo la kawp tawh, an sulhnu zui theihna remchang an nei mek.

Tun dinhmunah Los Angeles FC hi MLS Western Conference table-ah palina an ni mek a, an chesual viau a nih loh chuan playoff an khelh phak ngei a rinawm, champion tur erawh chuan kawng zawh tur an la nei thui.