A zawna vawi thum chak Punjab FC

Indian Super League-a match thum an khelh tawhah Punjab FC an la chak vek - season hmasaa ISL khel ṭan ve chauh club hian Nilaini zan khan Hyderabad FC chu 2-0 in an hneh a, match thum aṭangin point kua an nei.

Punjab tan hian Argentine attacking midfielder Ezequiel Vidal leh Croatian midfielder Filip Mrzljak te chuan goal khat ve ve an khung a, hun tawp thlenga a chhanletna an neih theih loh avangin Hyderabad an tlawm.

Mizo player awm lohna Punjab-in match thum an khelh aṭanga point kua an neih laiin, Hyderabad erawh match hnih an khelh tawhah an la tlawm ve ve a, point hmu loin an awm mek. Nilaini zan inkhelah hian HFC tan Ramhlunchhunga chuan inkhel bul a ṭan a, defender Laldanmawia chu bench aṭangin a lut bawk.

Punjab hian season hmasa khan I League nomawi chawipuitu Staikos Vergetis hoin ISL an hmachhawn a, mahse, season tawp rual khan an inṭhen. Mi tam takin Punjab thutlukna mak an ti a, mahse, PFC hi an tumah an chiang.

Vergetis ang thoa Greece mi Panagiotis Dilmperis chu coach atan an la lut a, kum 49 mi coach hi ISL-a a match hmasa pathuma chak vek thei coach hmasa ber a ni.