Author Jhumpa Lahiri'n chawimawina dawn tur a hnar

Author Jhumpa Lahiri chuan New York City-a Noguchi Museum in 2024 Isamu Noguchi Award a pek tur chu Museum hian thawktu pathum, Palestinian mite an thlawpna lantira keffiyeh head scarve inbelte a ban vangin a award dawn tur chu a hnar.

Hemi chungchangah hian Museum lam pawhin thuchhuah siamin, "Jhumpa Lahiri chuan 2024 Isamu Noguchi Award dawng tura thlan a lo pawm tawh chu kan dress code policy a duh loh avangin a sut leh a ni," an ti. A duh thlanna chu an zahsak thu an sawi a, dress code policy an siam chu mi zawng zawng duh dan a ni vek kher lo tih pawh an hriatthiam thu an sawi bawk.

Noguchi Museum hi Japanese American designer leh sculptor, Noguchi-a'n kum 40 dawn liam taa a din a ni. Kumin August thla aṭang khan museum hian dress code policy thar hmangin, thawktute chu politics, slogan leh symbol kaihhnawih leh lantirna thuam inbel a khap a, mahse thawktu pathumte hian an inbel luih avangin an ban a ni. He policy hian museum tlawhtute erawh a huam tel lo thung.

Indian-origin writer Lahiri hian kum 2000 khan a lehkhabu, "Interpreter of Maladies." hmangin Pulitzer Prize pawh a lo dawng tawh a ni. Englisth leh Italian-in fiction leh non-fiction lehkhabu eng emaw zat a ti chhuak tawh a ni.

Gaza Strip-a Israel-Hamas indona thleng mekah, Palestinian mite an thlawpna leh, indo ti tawp tura Israel an phutna lantirin hmun hrang hrangah nawrh huaihawtte chuan keffiyeh head scarf a inbel a ni. Hetih lai hian Israel thlawptu lam chuan hei hi firfiaka chete an thlawpna lantirna a ni tiin a puh ve thung.